Halldór Árnason.

F. nál. 1720, d. 1758 eða 1759. Faðir: Árni Jónsson b. á Fossum. Bóndi á Fossum 1753 til æviloka. Halldóri var úthlutað gjafakorni 8. jan. 1757. – Kona, g. 18. okt. 1750, Helga Jónsdóttir, f. um 1726 á Brandsstöðum, d. 24. sept. 1820 í Ytra-Tungukoti. For.: Jón Símonsson b. á Brandsstöðum og k.h. Guðný Jónsdóttir. Helga bjó ekkja á Fossum 1758-1759-, en giftist svo Jóni Jónssyni b. á Fossum. Börn: Árni, f. um 1752, var hjá móður sinni á Fossum 1762. Jón, f. um 1753, b. í Köldukinn á Ásum, kv. Þórunni Kráksdóttur.

(Þjóðsögur Jóns Árnasonar III, 53-54; Húnavaka 1977, 78-82).

Halldór Árnason.

F. um 1730, d. 3. nóv. 1785 á Núpi á Laxárdal fremri. For.: Árni Halldórsson b. á Fjósum og f.k.h. Ingveldur (föðurnafn ótilgreint). Bóndi á Fjósum -1762-1774 og á Núpi 1774 til æviloka. Talið er að Halldór kunni að hafa lesið eitthvað undir skóla. – Kona: Guðrún Halldórsdóttir, f. um 1728, d. 1811 (gr. 2. júní 1811) á Árbakka á Skagaströnd, ekkja Helga Guðmundssonar b. á Illugastöðum á Laxárdal fremri. Foreldrar hennar munu hafa verið Halldór Gamalíelsson b. á Illugastöðum og k.h. Halldóra Gísladóttir. Guðrún var búlaus í Engihlíðarhreppi 1753-1754-. Hún bjó ekkja á Núpi 1785-1787 og 1788-1790, en var í skjóli fóstursonar síns Þorkels Jónssonar á Úlfagili á Laxárdal fremri -1800-1801-. Barnlaus.

(Blanda IV, 81; Skiptab. Hún. 4. júní 1772; Ættatölub. Jóns Espólíns, 606 og 2973; Ættatölub. Ólafs Snóksdalíns, 342, 487 og 488; Ættatölub. Steingríms Jónssonar, 306).

Halldór Gíslason.

F. 21. ágúst 1808 á Snæringsstöðum í Svínadal, d. 20. ágúst 1898 á Guðlaugsstöðum í Blöndudal. For.: Gísli Halldórsson b. á Hofi í Vatnsdal og s.k.h. Ingibjörg Sigurðardóttir. Var með móður sinni í Sólheimum í Svínavatnshreppi 1816 og fermdist í Auðkúlusókn 1825. Vinnumaður í Gafli í Svínadal -1832-1833, á Guðrúnarstöðum í Vatnsdal 1833-1835, á Aðalbóli í Miðfirði 1835-1838 og á Guðlaugsstöðum 1838-1846. Bóndi í Ytra-Tungukoti 1846-1860. Vinnumaður í Hamrakoti á Ásum 1860-1862 og á Guðlaugsstöðum 1862-1882. Þurfamaður á Guðlaugsstöðum 1882 til æviloka. – Kona, g. 15. maí 1846, Guðbjörg Gísladóttir, f. 15. ágúst 1827 í Ytra-Tungukoti, d. 13. sept. 1859 á sama stað. For.: Gísli Sigurðsson b. í Ytra-Tungukoti og k.h. Sigríður Guðmundsdóttir. Hún var hjá foreldrum sínum í Ytra-Tungukoti 1840 og fermdist í Blöndudalshólasókn 1841. Halldór og Guðbjörg voru systkinabörn. Börn: Gísli, f. 12. ágúst 1847 í Ytra-Tungukoti, b. í Eyvindarstaðagerði, kv. Guðrúnu Ingibjörgu Gísladóttur. Bjarni, f. 19. ágúst 1849 í Ytra-Tungukoti, d. 4. sept. 1849 á sama stað. Sigríður, f. 24. maí 1851 í Ytra-Tungukoti, d. 12. jan. 1923 á Ásum á Bakásum, vk. í Valdarási í Víðidal 1880 og í Stóradal í Svínavatnshreppi 1890, en á Syðri-Löngumýri í Blöndudal 1901, óg. Ingveldur Ingibjörg, f. 18. júlí 1852 í Ytra-Tungukoti, d. 21. júlí 1852 á sama stað. Bjarni Þorvarður, f. 19. sept. 1854 í Ytra-Tungukoti, d. 2. ágúst 1855 á sama stað. Bjarni Þorvarður, f. 21. sept. 1855 í Ytra-Tungukoti, d. 5. okt. 1855 á sama stað. Guðrún, f. 12. des. 1857 í Ytra-Tungukoti, d. 2. febr. 1945 á Ísafirði, vk. á Spákonufelli á Skagaströnd 1880 og á Sauðárkróki 1890, en síðar á Ísafirði, óg. Barnsmóðir: Solveig Guðmundsdóttir, f. 7. okt. 1802 á Miklabæ í Blönduhlíð, vk. á Guðlaugsstöðum. For.: Guðmundur Ólafsson vm. á Víðivöllum í Blönduhlíð 1801 og barnsm.h. Ásný Jónsdóttir vk. á Miklabæ. Hún var húskona á Hamri á Bakásum 1856-1860. Barn: Ingibjörg, f. 8. jan. 1840 á Guðlaugsstöðum, húsm. í Stóradalsseli á Sléttárdal, óg., en átti son með Sveini Kristjánssyni b. í Litladal í Svínavatnshreppi.

(Frændgarður I, 291; Svipir og sagnir, 95; Húnavaka 1970, 158 og 1981, 121; Skiptab. Hún. 18. nóv. 1843, 1. apríl 1844 og 21. apríl 1845; Eiðsstaðaætt – Handrit Björns Bjarnasonar á Brandsstöðum; Ættatölub. Jóns Espólíns, 5487; Ættatölub. Ólafs Snóksdalíns, 535, 721 og 723; Ættatölub. Steingríms Jónssonar, 5866).

Halldór Guðmundsson.

F. um 1656, dr. í maí 1719 í Blöndu. For. ókunnir. Bóndi í Sellandi -1699-1700- og á Eldjárnsstöðum í Blöndudal -1701 til æviloka. – Kona: Gróa Hildibrandsdóttir, f. um 1659, á lífi í Svínavatnshreppi 1744. Óvíst er um foreldra hennar, en hún hefur verið systir Þorbjargar Hildibrandsdóttur þurfak. í Svínavatnshreppi 1703. Gróa var þurfakona í Svínavatnshreppi -1735-1736, á Þröm í Blöndudal 1736-1737 og í Svínavatnshreppi 1737-1744. Börn: Valgerður, f. um 1689, var hjá foreldrum sínum á Eldjárnsstöðum 1703. Guðmundur, f. um 1692, var hjá foreldrum sínum á Eldjárnsstöðum 1703.

(Hrakfallabálkur, 47; Annálar 1400-1800 I, 624).

Halldór Ísaksson.

F. um 1725, d. 1787 (gr. 1. apríl 1787) á Ánastöðum á Vatnsnesi. Faðir: Ísak Bjarnason b. í Miðhópi í Víðidal. Bóndi á Ytri-Leifsstöðum -1751-1758, á Eiríksstöðum 1758-1763-, á Lækjamóti í Víðidal -1772-1781 og á Grund í Vesturhópi 1781-1786. Húsmaður á Ánastöðum 1786 til æviloka. Halldóri var úthlutað gjafakorni 8. jan. 1757. – Kona: Vilborg Einarsdóttir, f. um 1721, d. 1782 (gr. 16. mars 1782) á Grund. Faðir: Einar Árnason b. í Syðri-Mjóadal. Börn: Kristín, f. um 1748, g. Jóni Sveinssyni b. í Dalkoti á Vatnsnesi. Guðrún, f. um 1752, vk. á Ánastöðum, óg., en átti dóttur með Jóni nokkrum.

(Biskupsskjalasafn VII; Sýsluskj. Hún. XV, 3, 10. nóv. 1791 (dánarbú Magnúsar Bjarnasonar á Ánastöðum).

Halldór Jónasson.

F. 11. júlí 1810 á Skeggsstöðum, d. 17. maí 1863 í Syðra-Tungukoti. For.: Jónas Björnsson b. á Botnastöðum og barnsm.h. Rósa Bjarnadóttir heimasæta á Skeggsstöðum, síðar g. Þorkeli Jónssyni b. á Skeggsstöðum. Var hjá móður sinni og stjúpa á Skeggsstöðum 1823 og fermdist í Bólstaðarhlíðarsókn 1825. Vinnumaður að hálfu á Kirkjuhóli hjá Víðimýri og að hálfu á Skeggsstöðum 1834-1835 og á Kirkjuhóli 1835-1836. Húsmaður á Kirkjuhóli 1836-1837. Bóndi á Hóli 1837-1838, í Steinárgerði 1838-1839 og í Syðra-Tungukoti 1839-1844. Vinnumaður á Staðarbakka í Miðfirði 1844-1846, á Guðlaugsstöðum í Blöndudal 1846-1847 og á Brún 1847-1849. Húsmaður í Syðra-Tungukoti 1849-1850. Bóndi í Syðra-Tungukoti aftur 1850-1853. Ráðsmaður í Kóngsgarði 1853-1854 og hafði jafnframt bú í Syðra-Tungukoti. Bóndi í Syðra-Tungukoti enn 1854-1859 og í Hvammi í Svartárdal 1859-1860. Húsmaður á sama stað 1860-1861. Bóndi í Syðra-Tungukoti enn 1861 til æviloka. – Fyrsta kona, g. 8. okt. 1835, Oddný Halldórsdóttir, f. 22. okt. 1814 á Kirkjuhóli, d. 15. júní 1869 á Aðalbóli í Miðfirði. For.: Halldór Halldórsson b. á Kirkjuhóli og k.h. Guðbjörg Jónsdóttir. Oddný var hjá foreldrum sínum á Kirkjuhóli 1817 og fermdist í Víðimýrarsókn í Skagafjarðarsýslu 1827. Hún var vinnukona á Eldjárnsstöðum í Blöndudal 1830-1833 og á Skeggsstöðum 1833-1834. Halldór og Oddný skildu á árunum 1845-1855. Hún var vinnukona á Staðarbakka 1844-1850, á Húki í Miðfirði 1850-1851, á Skeggjastöðum í Miðfirði 1851-1852, á Húki aftur 1852-1853 og á Ytri-Kárastöðum á Vatnsnesi 1853-1855, en reisti þá bú á Saurum í Miðfirði með seinni manni sínum Jóni Þorsteinssyni. Börn: Halldór, f. 13. okt. 1833 á Skeggsstöðum, d. 4. apríl 1835 á Kirkjuhóli. Margrét, f. 13. febr. 1835 á Kirkjuhóli, d. 24. ágúst 1913 á Kolbeinsá í Hrútafirði, vk. á Syðri-Reykjum í Miðfirði 1880, óg., en átti son og dóttur með Jóni Halldórssyni vm. á Svertingsstöðum í Miðfirði 1860. Rósa, f. 25. jan. 1836 á Kirkjuhóli, d. 24. jan. 1837 á Skeggsstöðum. Rósa, f. 19. okt. 1839 í Syðra-Tungukoti, g. Ólafi Árnasyni b. á Skottastöðum. Guðrún, f. 6. júní 1841 í Syðra-Tungukoti, d. 22. sept. 1841 á sama stað. Önnur kona, g. 4. nóv. 1855, Sigríður Gísladóttir, f. 23. júní 1808 í Gullbrekku í Saurbæjarhreppi, d. 11. mars 1860 í Hvammi. For.: Gísli Þorsteinsson b. á Kolgrímastöðum í Saurbæjarhreppi og k.h. Guðrún Kjartansdóttir. Sigríður var hjá foreldrum sínum á Kolgrímastöðum 1816 og fermdist í Saurbæjarsókn í Eyjafjarðarsýslu 1822. Hún var vinnukona í Hólum í Saurbæjarhreppi 1826-1828, í Saurbæ í Saurbæjarhreppi 1828-1835, á Efstalandi í Öxnadal 1835-1836, í Kóngsgarði 1836-1837- og á Syðri-Leifsstöðum -1839-1841-. Bústýra hjá Þorsteini bróður sínum í Kóngsgarði -1842-1852. Vinnukona á sama stað 1852-1853, en bjó í Kóngsgarði 1853-1854 og var Halldór ráðsmaður hjá henni það fardagaár. Hún var bústýra hjá Halldóri í Syðra-Tungukoti 1854-1855. Barnlaus. Þriðja kona, g. 16. nóv. 1862, Una Jóhannesdóttir, f. 16. jan. 1824 í Minna-Holti í Fljótum, d. 18. jan. 1891 á Fossum. For.: Jóhannes Guðvarðsson b. á Sigríðarstöðum í Flókadal og k.h. Sigríður Ólafsdóttir. Una var hjá foreldrum sínum á Sigríðarstöðum 1835 og fermdist í Barðssókn í Skagafjarðarsýslu 1838. Hún var vinnukona á Sigríðarstöðum 1845-1848, á Miklahóli í Viðvíkursveit 1848-1849, í Ásgeirsbrekku í Viðvíkursveit 1849-1853, á Ytri-Mælifellsá á Efribyggð 1853-1854, í Kolgröf á Efribyggð 1854-1855, í Hamarsgerði á Fremribyggð 1855-1856, í Kolgröf aftur 1856-1860 og á Steiná 1860-1861, en bústýra hjá Halldóri í Syðra-Tungukoti 1861-1862. Una bjó ekkja í Syðra-Tungukoti 1863-1864 og í Sellandi 1864-1883, en var vinnukona í Rugludal 1883-1886, á Steiná aftur 1886-1888, á Torfustöðum 1888-1889, á Brún 1889-1890 og á Fossum 1890 til æviloka. Una var talin mjög dugleg og kjarkmikil. Hún gekk að slætti með öðrum karlmannsverkum. Börn: Halldór Jóhannes, f. 22. maí 1862 í Syðra-Tungukoti, b. í Kálfárdal, kv. Guðrúnu Gísladóttur. Halldóra Sigríður, f. 14. okt. 1863 í Syðra-Tungukoti, g. Sigurði Árna Davíðssyni b. í Hólagerði á Skagaströnd. – Barnsfaðir Unu: Gísli Guðmundsson, f. 8. apríl 1831 í Brimnesi í Viðvíkursveit, d. 1. sept. 1886 í Sólheimum í Blönduhlíð, b. á Vöglum í Blönduhlíð. For.: Guðmundur Jónsson b. á Læk í Viðvíkursveit og k.h. Þorbjörg Gísladóttir. Barn: Friðbjörn, f. 23. sept. 1852 í Ásgeirsbrekku, d. 10. mars 1857 á Brúnastöðum í Tungusveit. Barnsfaðir Unu: Stefán Ásmundsson, f. 26. nóv. 1826 í Eyhildarholti í Hegranesi, d. 10. júlí 1908 í Rípursókn í Skagafjarðarsýslu, b. á Kúfustöðum. For.: Ásmundur Þorbergsson b. í Hamarsgerði og barnsm.h. Björg Þórðardóttir vk. í Eyhildarholti, síðar g. Guðmundi Magnússyni b. í Selhaga. Barn: Una, f. 24. maí 1856 í Kolgröf, d. 20. apríl 1858 á sama stað.

Athugasemd: Solveig og Þóra Halldórsdætur, sonardætur Halldórs og Unu, höfðu fyrir satt að Una hefði verið í allnáinni frændsemi við Jóhannes Jóhannesson bæjarfógeta á Seyðisfirði. Því verður ekki fundinn staður í heimildum. En Una átti sitt elsta barn með Gísla Guðmundssyni, föðurbróður Jóhannesar.

(Dalamenn II, 72; Skagfirzkar æviskrár 1850-1890 I, 15-16 og 75, II, 298-301 og III, 51-53; Skagfirzkar æviskrár 1890-1910 I, 291-292; Skagfirzkar æviskrár 1910-1950 I, 100-104; Krákustaðaætt, 287; Ættir Austur-Húnvetninga II, 759; Feðraspor og fjörusprek, 138; Húnavaka 1970, 158 og 1977, 80; Landsyfirréttardómar II, 24-26 og 53-56; Dómab. Hún. 29. mars 1815; Skiptab. Hún. 11. júní 1841, 18. nóv. 1843, 1. apríl 1844, 21. apríl 1845 og 4. júní 1863; Ábúendatal í Inn-Eyjafirði – Handrit Stefáns Aðalsteinssonar í Reykjavík, 1175-1177; Eiðsstaðaætt – Handrit Björns Bjarnasonar á Brandsstöðum; Ættatölub. Bjarna Jóhannessonar, 55 og 780-781; Ættatölub. Jóns Espólíns, 2113, 2219, 3370, 5618 og 5894; Ættatölub. Ólafs Snóksdalíns, 312-313 (innskotsblöð), 482, 539, 553, 720 og 842; Ættatölub. Steingríms Jónssonar, 5014).

Halldór Jónsson.

F. nál. 1640, d. 1702 eða 1703 á Geitaskarði í Langadal. For.: Jón Egilsson b. og lögréttum. á Geitaskarði og k.h. Sigríður Jónsdóttir. Bóndi á Gunnsteinsstöðum -1678-1679- og á Geitaskarði -1699 til æviloka. Hann varð lögréttumaður úr Húnavatnsþingi 1675. Halldór var skáldmæltur. Hann var einn þeirra sem kærðu Árna Jónsson prest á Hofi á Skagaströnd fyrir galdra árið 1678. Halldór fékk hálft Geitaskarð í arf eftir föður sinn. – Kona: Halldóra Benediktsdóttir, f. um 1650, d. 1706. For.: Benedikt Björnsson b. í Bólstaðarhlíð og k.h. Guðrún Þorsteinsdóttir. Halldóra bjó ekkja á Geitaskarði 1702-1703-. Hún greiddi Guðmundi Sigurðssyni bónda á Álftanesi í Álftaneshreppi 6 hundruð í Tungunesi á Bakásum 7. júní 1703 fyrir landskuldir og leignagjald sem Guðmundur átti inni hjá Halldóri. Börn: Sigríður, f. um 1674, g. Jóni Jónssyni b. á Æsustöðum. Jórunn, f. um 1676, var hjá móður sinni á Geitaskarði 1703. Guðrún, f. um 1680, g. Jóni Arasyni b. í Hvammi í Langadal. Hún var tökukona á Undirfelli í Vatnsdal 1703. Guðrún, f. um 1682, g. Árna Sveinssyni b. á Uppsölum í Hálsasveit. Þórunn, f. um 1684, d. í ágúst eða í sept. 1746, búsett á Gilsbakka í Hvítársíðu 1708, en síðast í Reykholtssókn í Borgarfjarðarsýslu. Steinunn, f. um 1688, d. 1707, var hjá móður sinni á Geitaskarði 1703. Guðrún, f. um 1691, g. Hálfdani Sigurðssyni b. í Hrísakoti á Vatnsnesi. Gunnar, f. nál. 1680, búsettur í Danmörku 1708. Þórður. (Ættatölub. Ólafs Snóksdalíns, 213). Barnsmóðir ókunn. Barn: Þórunn, f. um 1674, vk. á Gunnsteinsstöðum 1703. – Barnsfaðir Halldóru: Árni Geirsson, f. um 1635, d. í okt. 1695 á Hóli í Hörðudal, pr. á Reynistað í Staðarhreppi 1665-1669 og á Munkaþverá á Staðarbyggð 1669. For.: Geir Markússon pr. á Helgastöðum í Reykjadal og k.h. Steinunn Jónsdóttir. Árni bjó síðar á Svignaskarði í Borgarhreppi, en síðast á Hóli. Hann varð alþingisskrifari 1677. Árni missti prestsembætti fyrir barneign sína með Halldóru. Barn þeirra fæddist 1669. Það dó ungt.

(Íslenzkar æviskrár I, 42 og 118-119, II, 31 og III, 91; Borgfirzkar æviskrár I, 126-127 og 171; Dalamenn I, 55; Lögréttumannatal, 39-40, 221 og 268-269; Sýslumannaæfir I, 367, 530, 534 og 576; Annálar 1400-1800 I, 429, II, 319, III, 379, 416-417 og 434 og IV, 143, 319 og 321; Alþingisb. XI, 293-294; Prestastefnudómar og bréfab. Gísla biskups Þorlákssonar, 89-94; Dómab. Hún. 26. apríl 1758; Ættatölub. Jóns Espólíns, 3320-3323, 3392 og 4197; Ættatölub. Jóns Magnússonar, 238, 465 og 474; Ættatölub. Ólafs Snóksdalíns, 52, 213 og 576; Ættatölub. Steingríms Jónssonar, 394, 1656 og 1815; Ættatölub. Þórðar Jónssonar, 142 og 217).

Halldór Jónsson.

F. 1789 á Spákonufelli á Skagaströnd, d. 2. febr. 1825 á Hólabaki í Þingi. For.: Jón Sveinsson b. á Strjúgsstöðum og k.h. Guðrún Guðmundsdóttir. Var hjá foreldrum sínum á Keldulandi 1801 og fermdist í Hofsprestakalli 1803. Bóndi á Strjúgsstöðum 1816-1824 og á Hólabaki 1824 til æviloka. Halldór var röskur maður. Hann varð úti í svokölluðum Kyndilmessubyl. – Kona, g. 1811, Helga Jónsdóttir, f. um 1775 á Miðgili í Langadal, d. 29. jan. 1852 á Höllustöðum í Blöndudal. For.: Jón Jónsson b. í Engihlíð í Langadal og k.h. Jarþrúður Jónsdóttir. Helga var hjá Sigríði systur sinni í Engihlíð 1801. Hún bjó ekkja á Hólabaki nokkra mánuði, en giftist þá Konráð Konráðssyni b. á Hólabaki. Börn: Stefán, f. 28. júní 1811 á Strjúgsstöðum, b. á Strjúgsstöðum, kv. Önnu Sveinsdóttur. Björg, f. 22. des. 1814 á Strjúgsstöðum, g. Jóni Halldórssyni b. á Höllustöðum, þau systrabörn. Guðmundur, f. 30. júlí 1817 á Strjúgsstöðum, d. 3. ágúst 1817 á sama stað. Jón, f. 2. nóv. 1820 á Strjúgsstöðum, d. 10. des. 1821 á sama stað. Jón, f. 24. des. 1821 á Strjúgsstöðum, d. 8. nóv. 1826 á Hólabaki. Sigurður, f. 13. ágúst 1823 á Strjúgsstöðum, d. 30. sept. 1823 á sama stað.

(Húnvetningasaga II, 612-614 og 619; Mannaferðir og fornar slóðir, 204 og 210; Hrakfallabálkur, 114; Skiptab. Hún. 3. des. 1825 og 8. des. 1827; Ættatölub. Ólafs Snóksdalíns, 442 og 499; Ættatölub. Steingríms Jónssonar, 6123).

Halldóra Jónsdóttir.

F. um 1720, á lífi á Gunnfríðarstöðum á Bakásum 1762. For.: Jón Arason b. í Hvammi í Langadal og k.h. Guðrún Halldórsdóttir. Húsmóðir í Nýlendu 1753-1754, þá ekkja, og á Gunnfríðarstöðum 1754-1762-. – Fyrri maður: Jón (föðurnafn ótilgreint), f. nál. 1715, b. í Vindhælishreppi. For. ókunnir. Barn: Hólmfríður, f. um 1745, g. Bjarna Bjarnasyni b. í Holti í Svínadal. Seinni maður, g. 1755, Vigfús Björnsson, f. um 1730, d. 6. des. 1792 á Syðri-Löngumýri í Blöndudal, b. á Gunnfríðarstöðum 1755-1765 og á Syðri-Löngumýri 1765 til æviloka. For.: Björn Jónsson b. á Syðri-Löngumýri og k.h. Hallfríður Jónsdóttir. Árið 1762 voru hjá þeim tveir drengir 6 og 3 ára og ein stúlka 17 ára. Barn: Björn, f. um 1758, b. á Brandsstöðum, kv. Ólöfu Símonsdóttur.

(Fortíð og fyrirburðir, 57-58; Hrakhólar og höfuðból, 185-187; Biskupsskjalasafn B VII; Skiptab. Hún. 14. og 15. mars 1775; Eiðsstaðaætt – Handrit Björns Bjarnasonar á Brandsstöðum; Ættatölub. Jóns Espólíns, 3322; Ættatölub. Ólafs Snóksdalíns, 719-720).

Hallgrímur

hét búandi í Ytra-Tungukoti 1807-1808.

Athugasemd: Má vera að hér sé kominn:

Hallgrímur Guðmundsson.

F. 1764 (sk. 18. okt. 1764) í Þverbrekku í Öxnadal, d. 24. sept. 1821 í Garpdalssókn í Barðastrandarsýslu. For.: Guðmundur Guðmundsson vm. á Bakka í Öxnadal og barnsm.h. Matthildur Þorláksdóttir vk. í Þverbrekku, síðar g. Þorsteini Jónssyni b. í Fagranesi í Öxnadal og á Geirmundarstöðum í Sæmundarhlíð. Bóndi í Garðshorni í Kræklingahlíð 1794-1795. Húsmaður í Garðshorni 1795-1796-. Vinnumaður í Sólheimum í Blönduhlíð -1801-1802-, á Auðólfsstöðum -1805-1806-, á Breiðabólstað á Fellsströnd -1817-1818, á Skarfsstöðum í Hvammssveit 1818-1819, á Efri-Múla í Saurbæjarsveit 1819-1820 og í Múla í Gilsfirði 1820-1821. Hallgrímur hlaut dóm fyrir sauðaþjófnað í Skagafjarðarsýslu í móðuharðindunum. – Kona, g. 6. jan. 1794, Aldís Ólafsdóttir, f. um 1765 í Ölduhrygg í Svarfaðardal, d. 6. jan. 1818 á Grund í Svarfaðardal. For.: Ólafur Árnason b. í Uppsölum í Svarfaðardal og f.k.h. Aldís Grímsdóttir. Aldís var vinnukona í Skógum á Þelamörk 1792-1793-, en á sveitarframfæri á Grund -1816 til æviloka. Í legorðsskýrslu úr Eyjafjarðarsýslu 1792 er hún sögð heilbrigð og rösk til þjónustu. Hallgrímur og Aldís skildu. Börn: Helga, f. 16. apríl 1795 í Garðshorni, g. Jóni Jónssyni b. á Miðhóli í Sléttuhlíð. Þorlákur, f. 23. apríl 1796 í Garðshorni, d. 5. maí 1799 á Miðsitju í Blönduhlíð. Barnsmóðir: Sigríður Böðvarsdóttir, f. um 1749 í Garðshorni á Þelamörk, d. 23. okt. 1839 í Syðra-Brekkukoti í Hörgárdal, vk. á Björgum í Hörgárdal. For.: Böðvar Þorsteinsson b. á Brita á Þelamörk og k.h. Rannveig Sigfúsdóttir. Sigríður var ekkja eftir Jón Gunnlaugsson vm. í Auðbrekku í Hörgárdal. Hún var vinnukona á Ásláksstöðum í Hörgárdal -1800-1801-. Barn: Bjarni, f. 4. des. 1789 á Björgum, b. í Sílastaðakoti í Kræklingahlíð, kv. Þuríði Böðvarsdóttur. Barnsmóðir: Ingibjörg Guðmundsdóttir, f. um 1766 í Ásbúðum á Skaga, d. 15. júlí 1843 á Núpi á Laxárdal fremri, vk. á Auðólfsstöðum. For.: Guðmundur Árnason b. í Ásbúðum og f.k.h. Una Ólafsdóttir. Ingibjörg var vinnukona á Eiðsstöðum í Blöndudal -1816-1817-. Barn þeirra fæddist 1805 á Auðólfsstöðum. Ennfremur kann umræddur Hallgrímur vel að hafa verið faðir að barni Solveigar Magnúsdóttur, f. 12. maí 1788 á Neðri-Mýrum í Refasveit, d. 31. maí 1839 í Eyvindarstaðagerði, vk. í Rugludal. For.: Magnús Ingimundarson b. í Ytra-Tungukoti og k.h. Þórdís Jónsdóttir. Barnið var: Kristín Hallgrímsdóttir, f. um 1810 í Rugludal, d. 20. febr. 1874 á Sleitustöðum í Kolbeinsdal, bústýra í Lágubúð á Bæjarklettum 1860, óg., en átti dóttur með Birni Jónssyni b. á Kúfustöðum. – Barnsfaðir Aldísar: Oddur Einarsson, f. 4. okt. 1765 í Efstakoti á Upsaströnd, d. 6. júlí 1834 á Klængshóli í Skíðadal, b. í Ytra-Kálfsskinni á Árskógsströnd. For.: Einar Oddsson b. í Ytra-Kálfsskinni og k.h. Guðrún Þorbjörnsdóttir. Barn: Sigríður, f. 3. sept. 1792 í Skógum.

(Frá Hvanndölum til Úlfsdala III, 771-772; Svarfdælingar I, 73-74 og 217-218 og II, 359; Dómab. Skag. 20. nóv. 1784; Skiptab. Eyj. 6. okt. 1775; Skiptab. Hún. 28. apríl 1840; Skiptab. Skag. 12. okt. 1842; Ættatölub. Jóns Espólíns, 4557 og 5460).

Hallgrímur Egilsson.

F. um 1716, á lífi í Fellssókn í Strandasýslu 1766. For.: Egill Árnason b. á Eyvindarstöðum og k.h. Jórunn Símonsdóttir. Bóndi á Syðri-Leifsstöðum -1751-1754-. Virðist hafa verið í Blöndudalshólasókn -1755-1756-. Vinnumaður á Ballará á Skarðsströnd -1759-1760. Bóndi í Miðhúsum í Kollafirði 1760-1763- og í Þrúðardal í Kollafirði -1765-. – Kona: Engilráð Auðunsdóttir, f. um 1721, á lífi á Efrabóli í Tungusveit 1784. For.: Auðun Jónsson b. og hreppstj. í Hraunsási í Hálsasveit og k.h. Guðrún Ásbjörnsdóttir. Engilráð giftist síðar Bjarna Ólafssyni vm. í Tungugröf í Tungusveit. Í skýrslu um munaðarlaus og þurfandi ungmenni í Blöndudalshólasókn 1755 segir um Hallgrím og Engilráð, ,,húsvillt bæði, hjálpa sér hvar kunna.” Börn: Helga, f. um 1746, d. 15. apríl 1788 í Hólssókn í Ísafjarðarsýslu, g. Halldóri vm. á Hóli í Bolungarvík. Hún var í Blöndudalshólasókn 1755, en vk. á Heydalsá í Tungusveit 1771 og á Kollafjarðarnesi í Tungusveit 1784. Þórunn, f. um 1752, d. 4. maí 1821 á Heydalsá, vk. á Felli í Kollafirði 1771 og á Tindi í Miðdal 1784, en á Kirkjubóli í Tungusveit 1801, óg. Guðrún, f. um 1755, g. Ara Guðmundssyni b. á Uppsölum í Seyðisfirði. Engilráð, f. 5. jan. 1760 á Ballará, d. 1760 (gr. 27. maí 1760) í Fellssókn. – Seinni maður Engilráðar, g. 1773, Bjarni Ólafsson, f. um 1739, á lífi á Efrabóli 1784, vinnumaður í Tungugröf -1773-1775, húsmaður í Arnkötludal í Tungusveit 1775-1776-, en b. í Arnkötludal -1777-1778- og á Efrabóli -1779-1784-. For.: Ólafur Jónsson b. í Húsavík í Tungusveit og f.k.h. Steinvör Guðmundsdóttir. Barnlaus.

Athugasemd: Hallgrímur gæti vel verið samnefndur maður (föðurnafn ótilgreint) sem var búlaus í Sellandi 1739-1740, á Eyvindarstöðum 1740-1741- og á Hóli -1745-1746-.

(Borgfirzkar æviskrár I, 89; Strandamenn, 193, 207, 260 og 272; Biskupsskjalasafn B VII; Ættatölub. Jóns Espólíns, 3651-3652; Ættatölub. Ólafs Snóksdalíns, 15-16; Ættatölub. Steingríms Jónssonar, 3993 og 4250).

Hallgrímur Jónsson.

F. 24. febr. 1787 í Borgargerði í Höfðahverfi, d. 26. jan. 1861 í Miklagarði á Langholti. For.: Jón Sigurðsson b. á Brita á Þelamörk og s.k.h. Guðrún Eiríksdóttir. Var hjá foreldrum sínum á Ytri-Bægisá á Þelamörk 1801 og fermdist í Bægisársókn í Eyjafjarðarsýslu 1803. Sagnir herma að Hallgrímur hafi verið í vinnumennsku hjá Guðrúnu Árnadóttur í Hrísgerði í Fnjóskadal á yngri árum. Vinnumaður í Garði í Aðaldal -1807-1808-, í Höfða í Höfðahverfi 1810-1811 og í Stóra-Holti í Fljótum 1811-1813. Bóndi í Neðra-Haganesi í Fljótum 1813-1815, á Keldum í Sléttuhlíð 1815-1821, á Vestara-Hóli í Flókadal 1821-1824, á Kálfsstöðum í Hjaltadal 1824-1825, á Steinsstöðum í Tungusveit 1825-1829, á Nautabúi á Neðribyggð 1829-1832, á Lýtingsstöðum í Tungusveit 1832-1833, á Fagranesi á Reykjaströnd 1833-1834, á Hjaltastöðum í Blönduhlíð 1834-1836 og í Hafursstaðakoti á Skagaströnd 1836-1837. Húsmaður á Stóru-Giljá í Þingi 1837-1838, á Húnsstöðum á Ásum 1838-1839 og á Vakursstöðum í Hallárdal 1839-1841. Bóndi á Geitaskarði í Langadal 1841-1845, í Syðra-Tungukoti 1845-1847 og á Hafsteinsstöðum í Staðarhreppi 1847-1850. Húsmaður á Varmalandi í Sæmundarhlíð 1850-1854. Bóndi í Miklagarði 1854 til æviloka. Hallgrímur var með hæstu mönnum, bolþrekinn en nokkuð niðurmjór, hálsinn stuttur og gildur, ennið breitt og mikið, augun greindarleg og svipurinn glaðlegur hversdagslega. Hann mátti kalla réttnefjaðan og andlitið var því allt í fríðara lagi. Hallgrímur var holdugur í meðallagi, hvítleitur, fremur handstór, ljóshærður ungur, en gránaði með aldri. Skegg lét hann vaxa á vöngum og höku, en rakaði efri og neðri vör, að þeirra tíma sið. Vöxturinn var hraustlegur, enda var hann talinn burðamaður á yngri árum. Yfirbragðið var höfðinglegt og tilsýndar bar hann sig vel, en nokkuð lýtti það, að höfuðið sýndist vera lítið í hlutfalli við líkamsstærð hans. Hallgrímur var fastmæltur og skýrmæltur og hafði söngrödd mikla og fagra. Hann var meðhjálpari í Mælifellskirkju, þegar hann bjó á Lýtingsstöðum, og hvar sem hann kom í guðshús var hann sjálfkjörinn í sálmasönginn, því hann var bæði raddmikill og lagvís. Hallgrímur var mikill gleðimaður og tíður gestur í veislum, drykkfelldur og kvenhollur í frekara lagi, mjúkmáll og sparaði eigi heityrði þau, er menn vildu heyra. Kallaður var hann lausráður og sjálfhælinn, en léttlyndur og bráðskemtinn í vinahópi. Hann var artarmaður á ýmsan hátt og mikill dýravinur. Hallgrímur var gáfaður og mjög vel að sér. Hann fór snemma að fást við lækningar og stundaði þær til æviloka jafnhliða búskap sínum. Lagði hann jöfnum höndum stund á lyflækningar og handlækningar, og hafði mikla þekkingu á þessu sviði, þó hann væri algjörlega sjálflærður. Er talið að hann hafi fyrstur hérlendra lækna byrjað að skera upp sullaveikt fólk. Þá skrifaði hann ritið Lítil hústafla, ,,lítið ágrip um hollan aðbúnað, sem auðvelt er öllum að brúka, til að halda heilsu og kröftum”, og var það prentað á Akureyri 1856. Hallgrímur var prýlilega skáldmæltur og orti mikið af rímum og tækifærisvísum. Hafa sumar rímur hans verið gefnar út, en aðrar liggja óbirtar í handritum. – Fyrri kona: Þuríður Jónsdóttir, f. um 1791, d. 3. mars 1825 á Kálfsstöðum. For.: Jón Ásgrímsson b. í Stóra-Holti í Fljótum og k.h. Anna Stefánsdóttir. Þuríður var í fóstri á Austara-Hóli í Flókadal 1792, en með föður sínum í Stóra-Holti 1802. Hún var vinnukona í Stóra-Holti 1811-1813. Þuríður var væn kona og sæmilega að sér. Börn: Guðmundur, f. 1813, dr. 26. maí 1834 í Húseyjarkvísl í Skagafjarðarsýslu, síðast vm. á Völlum í Vallhólmi. Guðný, f. 1. júní 1817 á Keldum, d. 16. febr. 1885 á Hnjúkum á Ásum, g. Þorvaldi Þorvaldssyni vm. á Sæunnarstöðum í Hallárdal, átti einnig syni með Guðmundi Ingimundarsyni b. í Skálahnjúki í Gönguskörðum, Sveini Þórðarsyni b. í Þrastarstaðagerði á Höfðaströnd og Pétri Jónssyni b. á Nautabúi á Neðribyggð, einn með hverjum. Guðrún, f. 24. júlí 1818 á Keldum, d. 7. sept. 1818 á sama stað. Jón, f. 18. des. 1819 á Keldum, b. á Ytra-Hóli á Skagaströnd, kv. Þorbjörgu Þorbergsdóttur, átti áður dóttur með Soffíu Stefánsdóttur. Dagbjört, f. 31. des. 1820 á Keldum, g. Sumarliða Þorsteinssyni b. í Sigríðarstaðakoti í Flókadal, átti áður dætur með Þorkeli Guðmundssyni b. á Löngumýri í Vallhólmi og Benedikt Þorsteinssyni b. í Kjartansstaðakoti á Langholti, eina með hvorum. Guðrún, f. 18. maí 1822 á Vestara-Hóli, d. 28. ágúst 1822 á sama stað. Gísli, f. 4. sept. 1823 á Vestara-Hóli, dr. 16. apríl 1847, vm. í Glæsibæ í Sléttuhlíð 1845, ókv. Hann fórst með skútunni Vigo. Hallgrímur, f. 29. nóv. 1824 á Kálfsstöðum, d. 5. des. 1824 á sama stað. Seinni kona, g. 2. júní 1832, Arnbjörg Eiríksdóttir, f. 17. maí 1799 á Nautabúi á Neðribyggð, d. 27. mars 1865 á sama stað, ekkja Jóns Þorkelssonar b. á Lýtingsstöðum. For.: Eiríkur Jónsson b. á Bakka í Vallhólmi og k.h. Herdís Jónsdóttir. Arnbjörg var hjá foreldrum sínum á Nautabúi 1801 og fermdist í Mælifellssókn í Skagafjarðarsýslu 1814. Hún var hjá foreldrum sínum í Þorsteinsstaðakoti í Tungusveit 1816, en bústýra hjá Jóni á Lýtingsstöðum 1829-1831. Hún bjó ekkja á Lýtingsstöðum 1831-1832, en var húskona í Miklagarði 1861-1862 og á Nautabúi 1862 til æviloka. Arnbjörg var skynsöm kona, ráðvönd og vel að sér. Börn: Herdís, f. 3. des. 1832 á Lýtingsstöðum, d. 13. mars 1847 í Syðra-Tungukoti. Arngrímur, f. 1833, d. 10. jan. 1834 á Fagranesi. Arngrímur, f. 1834, d. 20. sept. 1834 á Hjaltastöðum. Barnsmóðir: Ólöf Gísladóttir, f. 29. okt. 1790 á Miklabæ í Blönduhlíð, d. 30. mars 1881 á Kappastöðum í Sléttuhlíð, vk. á Róðuhóli í Sléttuhlíð. For.: Gísli Gunnarsson b. á Gvendarstöðum á Staðarfjöllum og barnsm.h. Ragnhildur Helgadóttir vk. á Miklabæ. Ólöf var með móður sinni á Miklabæ 1801, en bústýra í Glæsibæ í Sléttuhlíð 1845. Börn: Guðbrandur, f. 17. apríl 1821 á Róðuhóli, d. 7. maí 1821 á Tjörnum í Sléttuhlíð. Jón, f. 17. apríl 1821 á Róðuhóli, d. 30. ágúst 1821 í Sigríðarstaðakoti. Barnsmóðir: Sæunn Bjarnadóttir, f. 5. apríl 1803 í Hofssókn í Skagafjarðarsýslu, d. 17. des. 1856 á Frostastöðum í Blönduhlíð, vk. í Mýrakoti á Höfðaströnd. For.: Bjarni Gunnlaugsson b. í Langhúsum í Viðvíkursveit og barnsm.h. Ingibjörg Sveinsdóttir vk. í Hofssókn, síðar g. Eiríki Eiríkssyni b. í Mýrakoti. Sæunn var bústýra á Hring í Blönduhlíð 1845. Barn: stúlka, f. 22. júlí 1827 í Mýrakoti. Hallgrímur vildi ekki gangast við stúlkunni. Barnsmóðir: Ólöf Jónsdóttir, f. 18. febr. 1803 á Barði í Fljótum, d. 22. júní 1845 á Vöglum í Blönduhlíð, vk. í Brimnesi í Viðvíkursveit. For.: Jón Jónsson pr. á Barði og k.h. Guðrún Pétursdóttir. Ólöf var gift Jóni Rafnssyni b. á Nefsstöðum í Stíflu 1825-1826. Hún var áður gift Guðvarði Jónssyni b. á Stóru-Þverá í Fljótum, en giftist síðar Kristjáni Guðmundssyni b. á Hafsteinsstöðum í Staðarhreppi. Barn Hallgrímur, f. 21. maí 1829 í Brimnesi, d. 12. júní 1829 á sama stað. Barnsmóðir: María Jónsdóttir, f. 21. des. 1817 í Kúskerpi í Refasveit, d. 19. jan. 1847 í Vatnahverfi í Refasveit, vk. á Bakka í Vatnsdal. For.: Jón Guðmundsson b. í Skyttudal og barnsm.h. Ólöf Ólafsdóttir vk. í Kúskerpi. María giftist síðar Semingi Semingssyni b. í Vatnahverfi. Barn: Margrét, f. 16. mars 1839 á Bakka, d. 1. júlí 1839 á Vakursstöðum. Barnsmóðir: Guðrún Jóhannesdóttir, f. um 1807 í Fagranessókn í Skagafjarðarsýslu, d. 18. des. 1873 á Hnjúki í Vatnsdal, vk. á Fannlaugarstöðum í Laxárdal ytri. For.: Jóhannes Sigurðsson vm. í Fagranessókn og k.h. Kristín Sveinsdóttir. Barn: Ingibjörg, f. 21. des. 1839 á Fannlaugarstöðum, d. 12. maí 1841 á Selá á Skaga. Hallgrímur vildi ekki gangast við Ingibjörgu og var hún rituð Guðrúnardóttir eða Nóadóttir. Barnsmóðir: Sigríður Vigfúsdóttir, f. um 1803 á Kagaðarhóli á Ásum, d. 23. júní 1869 á Njálsstöðum á Skagaströnd, þurfak. á Árbakka á Skagaströnd. For.: Vigfús Rafnsson húsmaður í Mánavík á Skaga og sambýlisk.h. Málfríður Brandsdóttir, áður g. Jóni Ólafssyni b. á Kálfshamri í Nesjum. Barn: Sigríður, f. 10. júní 1840 á Árbakka, d. 5. febr. 1927 á Gimli í Nýja-Íslandi, vk. í Háagerði á Skagaströnd 1880 og á Hrauni á Skaga 1890, óg., en átti dætur með Þorsteini Björnssyni b. á Spákonufelli á Skagaströnd og Þorleifi Frímanni Björnssyni b. á Kjalarlandi á Skagaströnd, tvær með þeim fyrrnefnda og eina með þeim síðarnefnda. Hallgrímur vildi ekki gangast við Sigríði og var hún rituð Sigríðardóttir eða Hansdóttir. Hún var af sumum álitin dóttir Arents Arentssonar Aschlund b. á Hafursstöðum á Skagaströnd. – Fyrri maður Arnbjargar, g. 13. ágúst 1831, Jón Þorkelsson, f. 15. okt. 1790 í Merkigarði í Tungusveit, d. 10. des. 1831 á Lýtingsstöðum, b. á Lýtingsstöðum 1829 til æviloka. For.: Þorkell Guðmundsson b. í Merkigarði og k.h. Guðrún Þorleifsdóttir. Jón var hjá foreldrum sínum í Merkigarði 1801 og fermdist í Reykjasókn í Skagafjarðarsýslu 1803. Hann var hjá móður sinni í Merkigarði 1816, en ráðsmaður í Sauðaneskoti á Upsaströnd 1817-1818-. Vinnumaður á Upsum á Upsaströnd -1820-1821, í Merkigarði 1821-1824, á Bakka í Vallhólmi 1824-1826, í Merkigarði aftur 1826-1827 og á Bakka aftur 1827-1829. Jón var skarpur og vel viti borinn, sérlegur nokkuð og mjög hneigður fyrir grasalækningar, óstyrkur og mjög hjartveikur. Börn: Baldvin, f. 29. júní 1825 á Bakka, d. 6. des. 1827 á sama stað. Baldvin, f. 17. jan. 1829 á Bakka, d. 22. maí 1847 í Syðra-Tungukoti.

(Íslenzkar æviskrár II, 284-285; Borgfirzkar æviskrár I, 48 og XII, 65; Skagfirzkar æviskrár 1850-1890 I, 19, III, 239-242 og 255-257, IV, 336-338, V, 331-335, VI, 101-106, 161-164, 334-336 og 371-373 og VII, 152 og 246-249; Rímnatal II, 60-61; Húnvetningasaga II, 518-519 og 660 og III, 712-713, 835-836, 838-839, 883, 878-879 og 906-908; Saga frá Skagfirðingum II, 52, 109, 115, 135 og 173, III, 12-14, 19-20, 29-33, 36, 51, 54-55, 129, 132-133, 139, 163 og 165 og IV, 59, 109-110 og 112-113; Saga Skagstrendinga og Skagamanna, 136-137, 140-141 og 187; Heimar horfins tíma, 31-66 og 248-250; Ritsafn Stefáns Jónssonar á Höskuldsstöðum I, 86-89, 94 og 153 og II, 138-139 og 147; Sagnaþættir Gísla Konráðssonar, 76; Syrpa úr handritum Gísla Konráðssonar II, 261-262; Sagnir um slysfarir í Skefilsstaðahreppi, 49; Heimdragi I, 122-127; Amma, 121; Blanda IV, 316-357, V, 103, 186 og 287-288, VI, 104, 105-108 og VIII, 266; Sagnablöð III, 16; Sópdyngja I, 63-64; Silfurplötur Iðunnar, 261; Annáll nítjándu aldar II, 56 og 254 og III, 120; Lbs. 1121, 4to, 406; Lbs. 1301, 4to, 107; Dómab. Hún. 31. júlí 1810; Dómab. Skag. 26. júní 1819; Hreppsb. Vindhælishr. 1790-1830, 382; Skiptab. Hún. 17. mars 1832 og 23. apríl 1847; Skiptab. Skag. 22. okt. 1825, 28. febr. 1832, 30. júní 1846, 30. des. 1847 og 29. des. 1862; Ábúendatal í Staðarhreppi – Handrit Jóns Sigurðssonar á Reynistað, 96; Ábúendatal í Inn-Eyjafirði – Handrit Stefáns Aðalsteinssonar í Reykjavík, 3163-3166; Ættatölub. Jóns Espólíns, 988-989, 1184, 3064, 3332, 5588-5590 og 5994; Ættatölub. Ólafs Snóksdalíns, 260 og 827).

Hannes Hannesson.

F. um 1770 í Engihlíð í Langadal, d. 27. júlí 1853 á Víðimýri í Seyluhreppi. For.: Hannes Jónsson b. á Stóru-Mörk og s.k.h. Þuríður Bjarnadóttir. Fermdur í Glaumbæjarprestakalli í Skagafjarðarsýslu 1785. Vinnumaður í Skyttudal -1799-1800. Bóndi í Skyttudal 1800-1805 og á Orrastöðum á Ásum 1805-1815 og hafði jafnframt bú í Hamrakoti á Ásum 1806-1810 og 1811-1815. Bóndi á Tindum á Ásum 1815-1831 og á Ásum á Bakásum 1831-1838, en var í skjóli Einars sonar síns á Skeggsstöðum 1838-1851 og á Víðimýri 1851 til æviloka. – Kona: Björg Jónsdóttir, f. um 1777 á Harastöðum á Skagaströnd, d. 19. júlí 1843 á Skeggsstöðum. For.: Jón Jónsson b. í Skyttudal og k.h. Ingibjörg Pétursdóttir. Björg fermdist í Bergsstaðaprestakalli 1792, þá sögð 16 ára. Hún var í skjóli Einars sonar síns á Skeggsstöðum 1838 til æviloka. Hannes og Björg voru góðir búmenn og vel látin. Börn: Ingibjörg, f. um 1798 í Skyttudal, g. Jóni Ólafssyni b. í Blöndudalshólum. Þuríður, f. um 1799 í Skyttudal, g. Eiríki Helgasyni b. á Miðgili í Langadal, átti áður tvö börn með Guðmundi Guðmundssyni b. á Vesturá á Laxárdal fremri og það þriðja sem hún kenndi Jóni Guðmundssyni kaupam. að sunnan. Sigþrúður, f. um 1801 í Skyttudal, g. Gísla Jónssyni b. í Köldukinn á Ásum. Einar, f. 1803 í Skyttudal, b. á Skeggsstöðum, kv. fyrr Ingibjörgu Arnljótsdóttur, síðar Sigurlaugu Eyjólfsdóttur. Jóhannes, f. 16. des. 1806 á Orrastöðum, b. í Hvammi á Laxárdal fremri, kv. fyrr Margréti Andrésdóttur, síðar Guðrúnu Magnúsdóttur. Ólafur, f. 27. júlí 1808 á Orrastöðum, d. 28. júlí 1808 á sama stað. drengur, f. 4. okt. 1812 á Orrastöðum. Hann fæddist andvana. Björn, f. 8. des. 1813 á Orrastöðum, b. á Mosfelli í Svínadal, kv. fyrr Sólrúnu Þórðardóttur, síðar Guðrúnu Magnúsdóttur. Jón, f. 1815 eða 1816 á Tindum, b. á Hnjúkum á Ásum, kv. Margréti Sveinsdóttur.

(Dalamenn I, 107; Skagfirzkar æviskrár 1850-1890 III, 39-42 og VI, 98 og 277-278; Húnavaka 1976, 50-52; Biskupsskjalasafn B VII; Sýsluskj. Hún. XV, 3, 14. júlí og 1. og 3. sept. 1804 (samantekt um ættmenni Eyjólfs Gunnarssonar); Eiðsstaðaætt – Handrit Björns Bjarnasonar á Brandsstöðum; Ættatölub. Jóns Espólíns, 4770-4771, 5493, 6848 og 6849; Ættatölub. Ólafs Snóksdalíns, 312-313 (innskotsblöð), 337, 409b, 721-722 og 830; Ættatölub. Steingríms Jónssonar, 6113).

Hannes Jónatansson.

F. 1799 eða 1800 í Finnstungu, d. 4. júní 1887 á Ytra-Þverfelli. For.: Jónatan Jónsson b. í Eyvindarstaðagerði og k.h. Margrét Þorkelsdóttir. Var hjá foreldrum sínum í Finnstungu 1801, en hjá móðurömmu sinni Ingiríði Jónsdóttur í Kálfárdal -1813-1817-. Vinnumaður í Kálfárdal -1822-1824. Bóndi á Brenniborg á Neðribyggð 1824-1836. Búlaus á sama stað 1836-1837. Bóndi á Brenniborg aftur 1837-1840 og í Saurbæ á Neðribyggð 1840-1841. Vinnumaður á Steinsstöðum í Tungusveit 1841-1842. Lausamaður í Selhaga -1844-1845. Vinnumaður á Víðimýri í Seyluhreppi 1845-1846, á Kirkjuhóli hjá Víðimýri 1846-1847, á Eiríksstöðum 1847-1848 og á Gili 1848-1849. Bóndi í Bergsstaðaseli 1849-1863. Húsmaður á Stóra-Búrfelli í Svínavatnshreppi 1863-1865, á Eiríksstöðum 1865-1868 og á Barkarstöðum 1868-1871. Bóndi í Teigakoti 1871-1876. Húsmaður í Kálfárdal 1876-1879 og í Valadal á Skörðum 1879-1883. Þurfamaður á Ytra-Þverfelli 1883 til æviloka. Hannes var góður fjármaður. Hann hafði makaskipti á 17 hundruðum í Brenniborg fyrir Saurbæ við Ólaf Björnsson bónda í Saurbæ 20. maí 1840, og fékk auk þess 170 spesíur í milligjöf. – Fyrri kona, g. 4. okt. 1824, Sigríður Símonsdóttir, f. 1760 (sk. 6. maí 1760) í Auðbrekku í Hörgárdal, d. 6. febr. 1840 á Brenniborg, ekkja Þorfinns Jónssonar b. á Brenniborg. For.: Símon Sigurðsson Bech b. og smiður á Bakka í Öxnadal og f.k.h. Þuríður Jónsdóttir. Sigríður fermdist í Bakkasókn í Eyjafjarðarsýslu 1773. Hún bjó ekkja á Brenniborg 1816-1824 milli manna. Barnlaus. Seinni kona, kl. 14. maí 1850 / g. 30. okt. 1850, Sigríður Sigurðardóttir, f. um 1808 í Reynistaðarsókn í Skagafjarðarsýslu, d. 20. maí 1864 á Stóra-Búrfelli. For.: Sigurður Brandsson b. í Holtsmúla á Langholti og k.h. Halldóra Samsonsdóttir. Sigríður var með móður sinni á Reykjarhóli hjá Víðimýri 1820-1821-. Hún var vinnukona á Krithóli á Neðribyggð 1823-1824-, á Kirkjuhóli -1828-1831, á Brenniborg 1831-1832, í Eiríksstaðakoti 1832-1833, á Marbæli á Langholti 1833-1835, á Kirkjuhóli aftur 1835-1837, í Húsey í Vallhólmi 1837-1838 og í Hólkoti í Staðarhreppi 1838-1840. Bústýra hjá Hannesi í Saurbæ 1840-1841. Húskona á sama stað 1841-1842. Vinnukona á Steiná 1842-1843-. Húskona í Selhaga -1844-1845, í Brekku hjá Víðimýri 1845-1846 og á Kirkjuhóli 1846-1847. Vinnukona á Barkarstöðum 1847-1849. Húskona á Stóra-Búrfelli 1863 til æviloka. Sigríður var merkiskona, greind og vel að sér. Um hana er rituð eftirfarandi athugasemd Í Hreppsbók Staðarhrepps við fardagaárið 1822-1823: ,,Sigríður Sigurðardóttir, 14 vetra, foreldrar hennar Sigurður sál. og Halldóra Samsonsdóttir, fyrrum í Pottagerði, þiggur af hrepp í þetta sinn, væntist að komist á framfæri í vor, er viljug að læra og lesandi.” Börn: Ingibjörg, f. 30. ágúst 1832 í Eiríksstaðakoti, d. 4. febr. 1835 á Brenniborg. Sigfús, f. 20. des. 1837 í Húsey, b. á Barkarstöðum, kv. Hólmfríði Halldórsdóttur. Jón, f. 31. des. 1841 í Saurbæ, b. og póstur á Úlfarsfelli í Helgafellssveit, kv. fyrr Ósk Þorleifsdóttur, síðar Guðrúnu Magnúsdóttur. Guðrún, f. 19. okt. 1844 í Selhaga, d. 30. okt. 1844 á Gili. Ingibjörg, f. 19. okt. 1844 í Selhaga, g. Sveini Sigvaldasyni b. í Selhaga. Barnsmóðir: Margrét Guðmundsdóttir, f. 2. jan. 1803 í Glaumbæ á Langholti, d. 4. jan. 1890 í Ölduhrygg í Svartárdal, húsm. á Vallmúla á Efribyggð. For.: Guðmundur Sigurðsson vm. í Glaumbæ 1802, en síðar í Geldingaholti í Seyluhreppi, og barnsm.h. Herdís Jónsdóttir vk. í Glaumbæ. Barn: Jóhann, f. 27. okt. 1838 á Brenniborg, b. í Fremri-Svartárdal í Svartárdal, kv. fyrr Margréti Ólafsdóttur, síðar Guðlaugu Guðmundsdóttur, átti einnig syni með Ingibjörgu Pétrursdóttur og Maríu Ásmundsdóttur, einn með hvorri. Jóhann var við skírn lýstur sonur Árna Árnasonar ráðsm. á Vallmúla. – Fyrri maður Sigríðar Símonsdóttur, g. 13. júní 1781, Þorfinnur Jónsson, f. um 1731, d. 22. júlí 1816 á Brenniborg, b. á Hömrum á Fremribyggð -1762-1770-, á Brenniborg -1781-1792, á Víðimýri 1792-1802 og á Brenniborg aftur 1802 til æviloka. For.: Jón Ingimundarson b. á Vatni á Höfðaströnd og k.h. Sesselja Sigurðardóttir. Sagnir herma að Þorfinnur hafi alist upp í Héraðsdal í Tungusveit. Hann fermdist í Reykjasókn í Skagafjarðarsýslu 1745, þá sagður 14 ára. Hann var hreppstjóri í Lýtingsstaðahreppi í Skagafjarðarsýslu 1765-1792 og varð lögréttumaður úr Hegranesþingi 1764. Þorfinnur var mikill ráðvendnismaður og orðlagt góðmenni. Hann seldi 21 hundrað í Stóruvöllum í Bárðardal Sigurði Jónssyni bónda á Litluvöllum í Bárðardal fyrir 94 ríkisdali 24. sept. 1793. Hann eignaðist Brenniborg með fyrra kvonfangi sínu. Börn: Símon, f. um 1781, d. 5. apríl 1786 á Brenniborg. Jónatan, f. um 1782 á Brenniborg, b. og hreppstj. á Uppsölum í Blönduhlíð, kv. fyrr Helgu Sigurðardóttur, síðar Rósu Jónasdóttur. Ragnheiður, f. 25. mars 1787 á Brenniborg, g. Jóni Rögnvaldssyni b. og skipasmið á Þverá í Hallárdal. Símon, f. um 1788 á Brenniborg, b. á Illugastöðum á Laxárdal fremri, kv. Ragnheiði Jónsdóttur. Barnsfaðir Sigríðar Símonsdóttur: Jón Jónsson, f. um 1747, d. 6. sept. 1794 í Myrkársókn í Eyjafjarðarsýslu, lausam. í Bjarnarhöfn í Helgafellssveit 1784. For.: Jón Jónsson pr. í Blöndudalshólum og k.h. Kristín Ísleifsdóttir. Jón ,,var litterat maður, þó aldrei dimissus, hafði víst góðar gáfur, skáldmenni nokkuð”, ritar prestur í kirkjubók við greftrun hans. Hann var kallaður hinn lærði. Barn: Jón, f. 1778 (sk. 9. nóv. 1778) á Bakka, d. 1778 (gr. 17. nóv. 1778) á sama stað. – Barnsfaðir Sigríðar Sigurðardóttur: Jón Jónsson, f. um 1800 á Syðra-Skörðugili á Langholti, dr. 21. nóv. 1859 í Héraðsvötnum, húsmaður á Marbæli á Langholti 1835. For.: Jón Jónsson b. á Syðra-Skörðugili og k.h. Guðrún Jónsdóttir. Jón var hjá foreldrum sínum á Syðra-Skörðugili 1801. Hann var fríður sýnum, karlmenni til burða, mikill hestamaður og góður tamningamaður. Hann var kallaður skarði. Barn: Jóhannes, f. 10. okt. 1835 á Kirkjuhóli, d. 13. apríl 1837 á sama stað. – Fyrri kona Þorfinns: Ragnheiður Sæmundsdóttir, f. nál. 1750, d. 1780 eða 1781. For.: Sæmundur Magnússon b. á Æsustöðum og 3.k.h. Sigríður Jónsdóttir. Barn: Málfríður, f. um 1773, d. 24. febr. 1789 á Brenniborg.

(Íslenzkar æviskrár III, 182 og V, 416; Dalamenn III, 426-427; Skagfirzkar æviskrár 1850-1890 I, 147-148 og 175-176, II, 162-163, 248-250, 275 og 290-293 og V, 249-250; Skagfirzkar æviskrár 1890-1910 I, 131-132 og 244-245; Svarfdælingar II, 335-336; Lögréttumannatal, 547; Söguþættir landpóstanna II, 239-241; Saga frá Skagfirðingum I, 115, 139 og 174, II, 88 og III, 21, 22-23, 39, 52, 66-67, 85, 107, 122, 139, 144, 165, 166, 172 og 174; Búsæld og barningur, 146; Hlynir og hreggviðir, 25-27; Misskipt er manna láni I, 155 og 160-161; Ritsafn Eiðs Guðmundssonar á Þúfnavöllum I, 91-92 og 161-162; Ritsafn Stefáns Guðmundssonar á Höskuldsstöðum IV, 125-126 og 195-197; Sagnaþættir Gísla Konráðssonar, 150-153; Syrpa úr handritum Gísla Konráðssonar II, 138-140 og 242; Æfisaga Gísla Konráðssonar, 4, 5 og 31; Saga I, 213; Húnavaka 1978, 50-51; Skagfirzkur annáll 1847-1947 I, 57-59; Annáll nítjándu aldar I, 215 og III, 219-220; Biskupsskjalasafn B VII; Alþingisb. XIV, 536, XVI, 39 og XVII, 89-90 og 251; Dómab. Skag. 8. maí 1765, 31. maí 1792 og 15. nóv. 1869; Skiptab. Skag. 1. júní 1781; Lbs. 95, fol. (Verslunarb. Hofsóskaupstaðar 1764-1769); Ábúendatal í Staðarhreppi – Handrit Jóns Sigurðssonar á Reynistað, 112 og 283; Skeggsstaðaætt – Handrit Björns Bjarnasonar á Brandsstöðum; Ættatölub. Jóns Espólíns, 865-866, 922, 1081, 1178, 1639, 2112-2113, 3806, 4191, 4208-4209, 4775 og 6933; Ættatölub. Ólafs Snóksdalíns, 64, 312-313 (innskotsblöð), 335, 337, 410, 411, 538, 539, 540-541, 542, 574, 684 og 913; Ættatölub. Sighvats Grímssonar Borgfirðings, 636-637; Ættatölub. Steingríms Jónssonar, 76-77, 80, 390, 965, 983, 3997, 4106 og 4900; sagnir gamalla Bólhlíðinga).

Hannes Jónsson.

F. um 1724, d. 27. maí 1800 á Merkigili í Austurdal. For.: Jón Jónsson b. á Stóru-Mörk og k.h. Guðríður Hannesdóttir. Bóndi á Sneis á Laxárdal fremri -1751-1752. Búlaus í Engihlíðarhreppi 1752-1753. Bóndi á Stóru-Mörk 1753-1759, á Geitaskarði í Langadal 1759-1760-, í Sauðanesi á Ásum 1762-1763-, í Engihlíð í Langadal -1773-1774 og í Holti á Ásum 1774-1794. Brá þá búi, orðinn ,,uppgefinn af elli og lúa” og snauður að fé. Hann var í skjóli Önnu dóttur sinni á Merkigili 1794 til æviloka. Hannes var hreppstjóri í Torfalækjarhreppi. – Fyrri kona: Steinunn Árnadóttir, f. nál. 1730. For.: Árni Einarsson b. í Bólstaðarhlíðarhreppi og f.k.h. Gróa Grímsdóttir. – Börn: Anna, f. um 1755 á Sneis, g. Þorvaldi Sigurðssyni b. á Reykjarhóli hjá Víðimýri. Elín, f. um 1756, var hjá frændfólki sínu á Hóli 1762. Seinni kona: Þuríður Bjarnadóttir, f. 1722 eða 1723 í Auðkúluprestakalli, á lífi í Holti 1794. For.: Bjarni Jónsson b. á Hrafnabjörgum í Svínadal og barnsm.h. Þórdís Oddsdóttir vk. í Auðkúluprestakalli. Þuríður er kennd við Víðimýri. (Ættatölub. Jóns Espólíns, 4770). Árið 1762 voru hjá þeim einn drengur 3 ára og ein stúlka 1 árs. Börn: Guðríður, f. um 1761, d. 30. júlí 1798 á Miklahóli í Viðvíkursveit, vk. á Þingeyrum í Þingi 1785, en síðast á Miklahóli, óg. Málfríður, f. um 1766 í Sauðanesi, d. 3. jan. 1840 í Brekku í Þingi, húsk. í Brekku 1835, óg., en átt son með Magnúsi Hálfdanarsyni b. í Brekku. Hannes, f. um 1770 í Engihlíð, b. í Skyttudal, kv. Björgu Jónsdóttur. Alls áttu Hannes og Þuríður 5 börn. Barnsmóðir ókunn. Barn: Jón, f. um 1750, b. á Æsustöðum, kv. Ingunni Guðmundsdóttur, átti áður dóttur með Guðrúnu Rafnsdóttur. Barnsmóðir ókunn. Barn: Sigríður, f. um 1763 á Holtastöðum í Langadal, g. fyrr Magnúsi Guðmundssyni húsmanni í Holti í Svínadal, síðar Jóni Jónssyni b. á Kárastöðum á Bakásum. Barnsmóðir: Ingibjörg Jónsdóttir, f. um 1760 á Stóru-Giljá í Þingi, d. 8. jan. 1843 í Þorgeirsstaðahlíð í Miðdölum, vk. í Holti. Óvíst er um foreldra hennar, en hún gæti hafa verið systir Kristínar Jónsdóttur s.k. Ólafs Ólafssonar b. á Beinakeldu á Reykjabraut og Steinunnar Jónsdóttur k. Guðmundar Jónssonar b. á Hróarsstöðum á Skagaströnd. Ingibjörg var bústýra á Steinsstöðum í Tungusveit -1800-1801-, en húskona á Hamri á Bakásum -1816-1817-, í Sólheimum í Svínavatnshreppi -1823-1824 og á Smyrlabergi á Ásum 1824-1825. Barneign Hannesar með Ingibjörgu var önnur hórdómssök hans. Barn: Elín, f. 4. mars 1794 í Holti, g. Rósinkar Guðmundssyni b. á Illugastöðum á Laxárdal fremri.

Athugasemdir: 1) Hannes gæti vel verið samnefndur maður sem bjó í Vík í Staðarhreppi -1749-1750-. 2) Hannes fór búferlum úr Engihlíðarhreppi í Torfalækjarhrepp 1762. 3) Hannes var enn bóndi í Torfalækjarhreppi fardagaárið 1767-1768. 4) Í Manntali á Íslandi 1816 er Anna Hannesdóttir, dóttir Hannesar og Steinunnar, talin fædd á Sneis og virðist það ótrúverðugt, því foreldrar hennar voru komin að Stóru-Mörk um það leyti sem hún fæddist. 4) Heimildum ber ekki saman um móðerni Jóns Hannessonar, sonar Hannesar. Í Húnvetningasögu er hann sagður sonur Steinunnar, fyrri konu Hannesar, en í Ættatölub. Ólafs Snóksdalíns er hann sagður laungetinn.

(Dalamenn I, 100; Húnvetningasaga II, 359-360; Saga frá Skagfirðingum II, 52 og 163; Húnavaka 1976, 50-52 og 58-59; Brandsstaðaannáll, 120; Sýsluskj. Hún. XV, 3, 19. júní 1786 (dánarbú Jóns Björnssonar á Fossi í Hrútafirði / samantekt um ættmenni Guðríðar Hannesdóttur); Alþingisb. XV, 38-39, 44, 72-73 og 77-78; Dómab. Hún. 4. maí 1723, 29. apríl 1762 og 25. maí 1763; Dómab. Skag. 6. maí 1750; Eiðsstaðaætt – Handrit Björns Bjarnasonar á Brandsstöðum; Ættatölub. Jóns Espólíns, 3743, 4770-4772 og 5493; Ættatölub. Ólafs Snóksdalíns, 312-313 (innskotsblöð), 337, 721-722 og 816; Ættatölub. Sighvats Grímssonar Borgfirðings, 2421-2425; Ættatölub. Steingríms Jónssonar, 5145).

Helga Björnsdóttir.

F. um 1663, á lífi á Höllustöðum í Blöndudal 1703. Faðir: Björn Erlendsson b. í Húnavatnssýslu. Húsmóðir í Syðra-Tungukoti -1701-1702 og á Höllustöðum 1702-1703-. – Barnsfaðir: Jón Þorleifsson, f. nál. 1640, d. 1702 eða 1703, b. á Eyvindarstöðum. For.: Þorleifur Ólafsson pr. í Finnstungu og barnsm.h. Guðríður vk. í Finnstungu. Barn: Björn, f. um 1702, var hjá móður sinni á Höllustöðum 1703.

(Ættatölub. Jóns Espólíns, 1173; Ættatölub. Ólafs Snóksdalíns, 36; Ættatölub. Sighvats Grímssonar Borgfirðings, 633).

Helga Jónsdóttir.

F. um 1762 á Smyrlabergi á Ásum, d. 10. okt. 1830 í Gafli í Svínadal. For.: Jón Halldórsson b. í Hvammi í Langadal og k.h. Guðrún Benediktsdóttir. Bjó ekkja í Hvammi í Langadal -1793-1794. Húskona á Gili 1794-1795 og í Kambakoti á Skagaströnd -1797-1801-. Hún bjó ekkja í Holtastaðakoti í Langadal -1810-1812, en var húskona á sama stað 1812-1813. Hún bjó aftur ekkja í Holtastaðakoti 1813-1815, en var bústýra í Hólabæ -1816-1822. Hún bjó ekkja í Hólabæ 1822 til æviloka, en andaðist hjá Jónasi syni sínum í Gafli. Helga er sögð lifa af ullarvinnu í Manntali á Íslandi 1801. – Fyrri maður, g. 19. maí 1792, Jónas Jónsson, f. nál. 1760, vm. í Holtastaðasókn. For. ókunnir. Barn: Jónas, f. um 1792 í Hvammi í Langadal, b. á Rútsstöðum í Svínadal, kv. fyrr Valgerði Ingjaldsdóttur, síðar Sæunni Gísladóttur, var einnig kennt barn af Ingibjörgu Jóhannesdóttur húsm. í Bólstaðarhlíð. Seinni maður, g. 1. maí 1798, Guðmundur Sigurðsson, f. um 1764, á lífi í Kambakoti 1801, vm. í Kambakoti. For. ókunnir. Börn: Guðrún, f. 14. ágúst 1799 í Kambakoti, d. 20. maí 1866 í Stardal á Kjalarnesi, vk. á Rútsstöðum 1850, óg., en átti tvíbura með Jóhanni Jónssyni vm. í Holti á Ásum. Jón, f. 1800 eða 1801, var hjá foreldrum sínum í Kambakoti 1801.

Athugasemd: Jónas Jónsson kann að hafa búið í Hvammi í Langadal fardagaárið 1792-1793.

(Skagfirzkar æviskrár 1850-1890 II, 82-84 og 118-119; Húnvetningasaga III, 694-695; Húnavaka 1979, 117-118; Sýsluskj. Hún. XV, 3, 3. nóv. 1790 og 27. júlí 1791 (dánarbú Guðrúnar Benediktsdóttur í Hvammi) og 22. júní og 23. sept. 1793 (dánarbú Jóns Halldórssonar í Hvammi) og XV, 4, 21. apríl og 7. og 8. júní 1797 og 16. febr. 1799 (dánarbú Þorsteins Benediktssonar á Stóru-Giljá); Dómab. Hún. 10. ágúst 1810).

Helga Magnúsdóttir.

F. um 1789 í Holtastaðasókn, d. 17. des. 1862 á Holtastöðum í Langadal. For.: Magnús Magnússon b. í Hrísakoti á Vatnsnesi og k.h. Guðný Ólafsdóttir. Var hjá foreldrum sínum í Hrísakoti 1801 og fermdist í Vesturhópshólasókn sama ár. Húsmóðir í Hrísakoti 1813-1816. Viðloðandi í Gottorp í Vesturhópi seinni part árs 1816. Húskona á Sölvabakka í Refasveit -1817-1818- og á Blöndubakka í Refasveit -1820-1821-. Búsett á Breiðavaði í Langadal á öndverðu ári 1825. Vinnukona á Síðu í Refasveit 1825-1826-. Bústýra á Síðu -1829-1830. Húskona á Fremstagili í Langadal 1830-1831. Bústýra á Holtastöðum 1831-1832 og á Strjúgsstöðum -1834-1839. Húsmóðir á Strjúgsstöðum 1839-1844 og í Bakkakoti í Refasveit 1844-1846. Húskona á Strjúgsstöðum -1849-1860 og hjá Hjálmari syni sínum á Kjalarlandi á Skagaströnd 1860-1861, en á Þorbrandsstöðum í Langadal 1861-1862 og síðast á Holtastöðum. Við húsvitjun í Vesturhópshólasókn 1815 er Helga sögð meinhæg og siðsöm og vel að sér. – Maður, g. 19. okt. 1812, Guðmundur Daníelsson, f. 1787 á Hofi í Hörgárdal, d. 9. sept. 1846 í Ytra-Krossanesi í Kræklingahlíð, b. í Hrísakoti. For.: Daníel Jónsson b. í Litlu-Brekku í Hörgárdal og k.h. Ingibjörg Rögnvaldsdóttir. Hann fermdist í Myrkársókn í Eyjafjarðarsýslu 1800. Guðmundur og Helga skildu. Börn: Hjálmar, f. 17. júní 1812 í Hrísakoti, b. í Hafursstaðabúð á Skagaströnd, kv. Karítas Sigurðardóttur, átti áður dóttur með Solveigu Jónsdóttur. Guðrún, f. 19. mars 1815 í Hrísakoti, d. 20. sept. 1881 á Eyvindarstöðum, vk. í Ytra-Tungukoti 1860, óg. Guðmundur, f. 28. ágúst 1816 í Gottorp, d. 23. maí 1866 á Leirá í Leirársveit, vm. á Grímarsstöðum í Andakíl 1860, ókv., en átti dóttur með Sigríði Ólafsdóttur. Barnsfaðir: Antoníus Jónsson, f. um 1785 í Nesi í Aðaldal, d. 17. júní 1845 á Hólmavaði í Aðaldal, b. í Skyttudal. For.: Jón Stefánsson pr. á Helgastöðum í Reykjadal og f.k.h. Rannveig Jónsdóttir. Barn: Grímur, f. 1821 (sk. 19. febr. 1821) á Blöndubakka, d. 4. nóv. 1854 á Ytri-Ey á Skagaströnd, vm. í Höfnum á Skaga 1850, ókv. Barnsfaðir: Jóhannes Jónsson, f. 1757 (sk. 30. okt. 1757) á Úlfagili á Laxárdal fremri, d. 6. des. 1841 í Ljótshólum í Svínadal, b. á Breiðavaði. For.: Jón Jónsson b. á Ytri-Ey á Skagaströnd og k.h. Ingibjörg Jónsdóttir. Barn: Jóhanna, f. 16. mars 1825 á Breiðavaði, d. 9. maí 1826 á Njálsstöðum á Skagaströnd.

(Íslenzkar æviskrár III, 277; Borgfirzkar æviskrár IX, 429; Ættir Austfirðinga, 847; Ættir Þingeyinga III, 56-57 og 129; Sjómenn og sauðabændur, 76-77; Búsæld og barningur, 144-146; Syrpa úr handritum Gísla Konráðssonar II, 338-339; Skiptab. Hún. 8. júní 1842; Ættatölub. Jóns Espólíns, 360-361, 2778 og 4774-4775; Ættatölub. Ólafs Snóksdalíns, 312-313 (innskotsblöð), 337, 548 og 824-825; Ættatölub. Steingríms Jónssonar, 4523 og 4930).

Helga Þorleifsdóttir.

F. um 1765, d. 24. apríl 1813 í Selhaga. Faðir: Þorleifur Þorleifsson b. og hreppstj. á Skarðsá í Sæmundarhlíð. Vinnukona á Skarðsá -1790-1795-. Búlaus í Kálfárdal 1797-1798. Húsmóðir í Selhaga 1798 til æviloka. Helga fór fyrst að búa í gömlu eyðiseli er fékk þá nafnið Selhagi. Þar elfdist bú hennar aðdáanlega á fáum árum með fjárfjölda og búsæld þar til hún dó. – Barnsfaðir: Oddur Oddsson, f. um 1746, d. 25. mars 1803 í Geldingaholti í Seyluhreppi, b. og smiður í Geldingaholti -1781 til æviloka. For.: Oddur Jónsson b. í Vík í Staðarhreppi og k.h. Helga Jónsdóttir. Oddur var hreppstjóri í Seyluhreppi 1797 til æviloka. Börn: Sigfús, f. 29. nóv. 1790 á Skarðsá, b. í Eiríksstaðakoti, kv. Björgu Jónasdóttur. Helga, f. 14. sept. 1794 á Skarðsá, g. Guðmundi Magnússyni b. í Vatnshlíð.

Athugasemdir: 1) Hægt er að láta sér til hugar koma að móðir Helgu Þorleifsdóttur kunni að hafa verið Sigríður Jónsdóttir, sem var hjá börnum hennar í Selhaga -1813-1814-, sögð 78 ára, titluð skyldmenni. 2) Oddur Oddsson er talinn 55 ára í Manntali á Íslandi 1801, en 54 ára við andlát 1803 í Prestsþjónustubók Glaumbæjarprestakalls.

(Frændgarður II – Ættmeiður, 181, 184-185 og 190; Saga frá Skagfirðingum I, 118 og 176 og II, 13 og 158; Búsæld og barningur, 150; Vorþeyr og vébönd, 214; Ættir og óðal, 41-42; Syrpa úr handritum Gísla Konráðssonar II, 342; Æfisaga Gísla Konráðssonar, 31; Húnavaka 1988, 127-131; Sýsluskj. Hún. XV, 7, 19. maí 1813 (dánarbú Helgu Þorleifsdóttur í Selhaga); Dómab. Skag. 20. maí 1795 og 10. maí 1797; Skiptab. Hún. 17. des. 1813; Ábúendatal í Staðarhreppi – Handrit Jóns Sigurðssonar á Reynistað; Skeggsstaðaætt – Handrit Björns Bjarnasonar á Brandsstöðum; Ættatölub. Jóns Espólíns, 1142 og 1181-1182; Ættatölub. Ólafs Snóksdalíns, 337 og 390-391; Ættatölub. Steingríms Jónssonar, 5270-5273).

Helgi Árnason.

F. um 1761 á Hofstöðum í Mývatnssveit, d. 15. mars 1838 í Brekku í Þingi. For.: Árni Illugason b. á Hofstöðum og k.h. Kristveig Marteinsdóttir. Búsettur í Vogum í Mývatnssveit 1785-1786 og í Ytri-Neslöndum í Mývatnssveit 1786-1787. Fangi í Reykjavík 1787-1788. Vinnumaður í Hvammi í Svartárdal -1789-1790-. Bóndi í Stafni 1798-1799, í Holtsmúla á Langholti 1799-1813 og á Kjartansstöðum á Langholti 1815-1826. Húsmaður í Beinhöll á Langholti 1826-1834, en var í skjóli Guðrúnar dóttur sinnar í Brekku 1834 til æviloka. Helgi var á yngri árum sagður baldinn en óheimskur. Hann var dæmdur til tukthúsvistar á dómþingi á Skútustöðum í Mývatnssveit 11. apríl 1787 og afplánaði dóminn í Reykjavík. Í Æfisögu Gísla Konráðssonar er hann sagður hafa verið skapstyggur. – Fyrri kona: Guðrún Höskuldsdóttir, f. 1758 (sk. 23. sept. 1758) á Syðstugrund í Blönduhlíð. For.: Höskuldur Guðmundsson b. á Syðstugrund og k.h. Þuríður Steingrímsdóttir. Guðrún var vinnukona í Syðri-Mjóadal -1786-1787- og á Barkarstöðum -1789-1790-. Barn: Guðrún, f. um 1798 á Barkarstöðum, g. Jóhanni Jónssyni b. í Brekku, átti áður son með Eyjólfi Jónassyni b. á Syðra-Þverfelli. Seinni kona, ls. 1801, Steinunn Jónsdóttir, f. um 1766 í Borgargerði í Borgarsveit, d. 30. mars 1841 í Beinhöll. For. ókunnir. Steinunn var vinnukona í Vík í Staðarhreppi -1799-1800 og í Holtsmúla 1800-1801-. Hún var talin fyrir búi þeirra hjóna á Kjartansstöðum 1813-1815. Hún var í húsmennsku í Beinhöll til æviloka. Helgi og Steinunn áttu saman barn í lausaleik í Reynistaðarsókn í Skagafjarðarsýslu 1801. Börn: Árni, f. um 1806 í Holtsmúla, d. 16. ágúst 1858 í Beinhöll, vm. í Beinhöll, ókv. Sigríður, f. um 1808 í Holtsmúla, d. 6. des. 1820 á Skarðsá í Sæmundarhlíð, var á sveitarframfæri á Skarðsá. Guðrún, f. um 1809 í Holtsmúla, d. 24. sept. 1866 í Jaðri á Langholti, vk. í Beinhöll, óg., en átti börn með Helga Árnasyni b. í Keflavík í Hegranesi og Hafliða Hafliðasyni b. í Skálahnjúki í Gönguskörðum, tvö með þeim fyrrnefnda og eitt með þeim síðarnefnda. – Dóttir Steinunnar var: Jóhanna Aradóttir, f. um 1789 í Reynistaðarsókn, húsm. í Beinhöll, óg., en átti barn með Jóni Jónssyni vm. í Ási í Hegranesi. Barnsfaðir Steinunnar: Sveinn Jónsson, f. um 1773, d. 21. júlí 1839 á Veðramóti í Gönguskörðum, b. á Veðramóti. For.: Jón Þorsteinsson b. á Litla-Vatnsskarði á Laxárdal fremri og f.k.h. Sigríður Þorsteinsdóttir. Barnið fæddist 1799. Sveinn sór fyrir það á dómþingi á Sauðá í Borgarsveit 7. sept. 1799.

Athugasemd: 2) Helgi og Steinunn bjuggu saman ógift í Holtsmúla við Manntal á Íslandi 1801, en hafa trúlega gengið í hjúskap örskömmu síðar.

(Skagfirzkar æviskrár 1850-1890 I, 100, IV, 120-122 og VI, 138-139; Laxdælir, 60-61; Ættir Þingeyinga VIII, 117; Saga frá Skagfirðingum I, 118 og 176 og II, 70 og 167; Ritsafn Stefáns Jónssonar á Höskuldsstöðum I, 46 og III, 45-48; Sagnaþættir Gísla Konráðssonar, 164-181; Söguþættir Gísla Konráðssonar, 12-13 og 15-16; Syrpa úr handritum Gísla Konráðssonar I, 274-280; Sagnaþættir Þjóðólfs, 277 og 281-283; Skagfirzk fræði VI, 63 og 67-69; Æfisaga Gísla Konráðssonar, 13, 60 og 196-197; Dómab. Þing. 11. apríl 1787; Dómab. Skag. 7. sept. 1799 og 30. apríl 1813; Skiptab. Skag. 5. maí 1813; Ábúendatal í Staðarhreppi – Handrit Jóns Sigurðssonar á Reynistað, 42, 252 og 307; Ættatölub. Jóns Espólíns, 3962; Ættatölub. Ólafs Snóksdalíns, 536; Ættatölub. Steingríms Jónssonar, 97).

Helgi Helgason.

F. nál. 1735, d. 1792 í Engihlíð í Langadal. For.: Helgi Árnason b. á Másstöðum í Vatnsdal og k.h. Guðrún Halldórsdóttir. Bóndi á Auðólfsstöðum -1773-1776, á Holtastöðum í Langadal 1776-1783-, í Glaumbæ í Langadal -1784-1789- og í

Engihlíð -1790 til æviloka. Helgi var sagður heiðursmaður. – Kona: Guðrún Guðmundsdóttir, f. um 1735, á lífi á Hnjúkum á Ásum 1801. For.: Guðmundur Magnússon b. á Árbakka á Skagaströnd og k.h. Oddný Ólafsdóttir. Guðrún bjó ekkja í Engihlíð 1792-1795-, en var í skjóli Elínar dóttur sinnar á Hnjúkum -1800-1801-. Börn: Elín, f. um 1765 á Árbakka, g. Guðmundi Sigurðssyni b. á Móbergi í Langadal. Eiríkur, f. um 1775 á Auðólfsstöðum, b. á Miðgili í Langadal, kv. fyrr Sigríði Jónsdóttur, síðar Þuríði Hannesdóttur.

(Húnavaka 1976, 51; Sýsluskj. Hún. XV, 3, 10. apríl 1792 (dánarbú Helga Helgasonar í Engihlíð); Eiðsstaðaætt – Handrit Björns Bjarnasonar á Brandsstöðum; Ættatölub. Jóns Espólíns, 2973; Ættatölub. Ólafs Snóksdalíns, 487).

Helgi Jónsson.

F. um 1739, d. 27. des. 1800 á Fjalli í Sæmundarhlíð. For.: Jón Jónsson b. á Stóru-Mörk og k.h. Guðríður Hannesdóttir. Búlaus í Þverárdal 1758-1759-. Bóndi í Þverárdal -1762-1782 og á Fjalli 1782-1791, en var í skjóli Árna sonar síns á sama stað 1791 til æviloka. Hann var hreppstjóri í Seyluhreppi í Skagafjarðarsýslu 1784-1785-. Helgi var merkisbóndi. Í fjárkláðafárinu tókst honum að verja kindur sínar. Fylgdi hann þeim sumar og vetur úr húsi og í, og gætti þess að þær kæmu aldrei nærri öðru fé. – Kona, ls. 1754 eða 1755, Sigþrúður Árnadóttir, f. um 1733, d. 8. júní 1808 á Fjalli. For.: Árni Einarsson b. í Bólstaðarhlíðarhreppi og f.k.h. Gróa Grímsdóttir. Hún var í skjóli Árna sonar síns á Fjalli 1791 til æviloka. Helgi og Sigþrúður áttu saman barn í lausaleik í Bólstaðarhlíðarhreppi 1754 eða 1755, og var það fyrsta frillulífisbrot beggja. Börn: Þórunn, f. um 1755 í Þverárdal, g. fyrr Guðmundi Jónssyni b. á Bollastöðum, síðar Birni Ólafssyni b. í Sellandi. Árni, f. um 1761 í Þverárdal, b. á Fjalli, kv. Margréti Björnsdóttur, átti einnig dóttur með Kristínu Jóhannesdóttur og son með Guðrúnu Þorvaldsdóttur. Gróa, dó ung. (Ættatölub. Ólafs Snóksdalíns, 312-313).

(Húnvetningasaga II, 359-360; Saga frá Skagfirðingum II, 41 og 162; Sagnaþættir Gísla Konráðssonar, 169; Söguþættir Gísla Konráðssonar, 229-230; Syrpa úr handritum Gísla Konráðssonar I, 279 og II, 320-321; Æfisaga Gísla Konráðssonar, 168-170; Huld I, 82; Sýsluskj. Hún. XV, 3, 19. júní 1786 (dánarbú Jóns Björnssonar á Fossi í Hrútafirði / samantekt um ættmenni Guðríðar Hannesdóttur); Dómab. Skag. 29. júní 1784; Ábúendatal í Staðarhreppi – Handrit Jóns Sigurðssonar á Reynistað, 34; Ættatölub. Jóns Espólíns, 4774 og 5493-5495; Ættatölub. Ólafs Snóksdalíns, 312-313 (innskotsblöð), 337 og 338d; Ættatölub. Sighvats Grímssonar Borgfirðings, 2424-2425).

Helgi Jónsson.

F. 26. sept. 1818 í Kolgröf á Efribyggð, d. 29. apríl 1879 á Vakursstöðum í Hallárdal. For.: Jón Ólafsson b. í Kálfárdal og k.h. Oddný Árnadóttir. Fermdur í Bólstaðarhlíðarsókn 1834. Bóndi í Kálfárdal 1844-1849, á Hryggjum á Staðarfjöllum 1849-1852, á Kimbastöðum í Borgarsveit 1852-1854 og í Hólkoti í Staðarhreppi 1854-1856. Húsmaður í Vík í Staðarhreppi 1857-1859. Vinnumaður á Dúki í Sæmundarhlíð 1859-1860, í Litladal í Svínavatnshreppi 1860-1861, í Vatnshlíð 1861-1864, í Ási í Hegranesi 1864-1870, í Vík 1870-1871, í Keldudal í Hegranesi 1871-1872-, á Hellulandi í Hegranesi -1874-1875 og á Vakursstöðum 1875 til æviloka. Helgi varð veill á geðsmunum síðustu æviárin. – Kona, g. 9. maí 1844, Ingiríður Þorkelsdóttir, f. 24. júní 1824 í Sólheimum í Sæmundarhlíð, d. 25. des. 1900 á Eiríksstöðum. For.: Þorkell Jónsson b. á Fjalli í Sæmundarhlíð og k.h. Sigþrúður Árnadóttir. Ingiríður fermdist í Víðimýrarsókn í Skagafjarðarsýslu 1839. Hún var húskona í Vík 1856-1859. Vinnukona á Ytra-Þverfelli 1859-1860, í Litladal 1860-1861, í Vatnshlíð 1861-1863, á Syðra-Skörðugili á Langholti 1863-1864 og á Geirmundarstöðum í Sæmundarhlíð 1864-1865-. Húskona á Ingveldarstöðum á Reykjaströnd -1869-1870 og á Valabjörgum á Skörðum 1870-1871. Vinnukona á Bollastöðum 1871-1872. Húskona í Sellandi 1872-1873 og á Bjarnastöðum í Vatnsdal 1873-1876. Bústýra hjá Jóni syni sínum í Heiðarseli í Gönguskörðum 1876-1879. Húskona á Steini á Reykjaströnd 1879-1880 og í Mjóadal 1880-1881. Bústýra hjá Jóni syni sínum í Móbergsseli í Litla-Vatnsskarði 1881-1882. Búsett á Meyjarlandi á Reykjaströnd -1883-1884, en var í skjóli Kristínar dóttur sinnar í Skyttudal 1884-1886 og í Hvammi á Laxárdal 1886-1887. Húskona í Kálfárdal 1887-1888, en var þurfakona í Mjóadal 1888-1891, í Ytra-Tungukoti 1891-1893, á Steiná 1893-1895, í Eyvindarstaðagerði 1895-1897 og á Eiríksstöðum 1897 til æviloka. Börn: Kristín, f. 14. mars 1845 í Kálfárdal, d. 31. júlí 1846 á sama stað. Þorkell, f. 27. júní 1846 í Kálfárdal, d. 23. júlí 1846 á sama stað. Jón, f. 29. sept. 1847 í Kálfárdal, b. í Móbergsseli, ókv. Árni, f. 1850 í Reynistaðarsókn í Skagafjarðarsýslu, d. 24. des. 1858 í Vík. Kristín, f. 20. apríl 1852 í Sjávarborgarsókn í Skagafjarðarsýslu, d. 5. des. 1937 í Portage la Prairie í Manitoba, g. Páli Jónssyni Nordal í Portage la Prairie, átti áður tvo syni með Þorláki Ásmundssyni b. í Hvammi á Laxárdal. Hún var bústýra í Skyttudal 1884-1886 og í Hvammi 1886-1887. Þorkell, f. 1855 í Reynistaðarsókn, d. 7. sept. 1855 í Hólkoti. Margrét, f. 31. júlí 1861 í Vatnshlíð, d. 1. sept. 1861 á sama stað.

(Skagfirzkar æviskrár 1850-1890 II, 120-121 og 307-309 og III, 108; Hlynir og hreggviðir, 27-28; Ábúendatal í Staðarhreppi – Handrit Jóns Sigurðssonar á Reynistað, 35 og 306; Skeggsstaðaætt – Handrit Björns Bjarnasonar á Brandsstöðum; Ættatölub. Jóns Espólíns, 575, 3931 og 5494; Ættatölub. Ólafs Snóksdalíns, 228, 335, 337 og 341).

Helgi Þórðarson.

F. um 1761 á Torfalæk á Ásum, d. 20. apríl 1828 á Brandsstöðum. For.: Þórður Helgason b. á Torfalæk og k.h. Ásta Pálsdóttir. Bóndi á Brandsstöðum 1791 til æviloka. Hann var meðhjálpari í Blöndudalshólakirkju. Helgi var smiður á gull og silfur. Hann skrifaði undir verslunarkærubréf í Bólstaðarhlíð 20. sept. 1797. – Fyrri kona, g. 16. júní 1791, Ólöf Símonsdóttir, f. um 1764 á Brandsstöðum, d. 25. maí 1822 á sama stað, ekkja Björns Vigfússonar b. á Brandsstöðum. For.: Símon Jónsson b. á Brandsstöðum og k.h. Ingigerður Brandsdóttir. Börn: Hólmfríður, f. um 1792 á Brandsstöðum, g. Birni Bjarnasyni b. á Brandsstöðum. Ingigerður, f. um 1794 á Brandsstöðum, húsm. á Brandsstöðum, g. fyrr Benedikt Tómassyni b. á Eiðsstöðum í Blöndudal, síðar Halldóri Auðunssyni b. á Eiðsstöðum. Seinni kona, g. 6. júní 1823, Ólöf Jónsdóttir, f. um 1769 í Rugludal, d. 13. okt. 1834 á Brandsstöðum. For.: Jón Jónsson b. í Rugludal og k.h. Helga Jónsdóttir. Ólöf var vinnukona í Rugludal -1800-1801-. Hún var búlaus í Finnstungu 1804-1806-, en bjó í Ytra-Tungukoti 1808-1823. Hún bjó ekkja á Brandsstöðum 1828-1830, en giftist þá Vigfúsi Guðmundssyni b. á Brandsstöðum. Barnlaus.

(Hrakhólar og höfuðból, 188-189; Vorþeyr og vébönd, 228-229; Húnaþing I, 492-495; Húnavaka 1977, 79-81 og 1978, 48-51; Brandsstaðaannáll, 7; Skiptab. Hún. 5. okt. 1795 og 2. apríl 1836; Eiðsstaðaætt – Handrit Björns Bjarnasonar á Brandsstöðum; Ættatölub. Ólafs Snóksdalíns, 574).

Helgi Þorkelsson.

F. um 1702, d. 19. febr. 1766 í Holtastaðasókn. For. ókunnir. Bóndi í Hvammi á Laxárdal fremri 1734-1735-. Búlaus í Bólstaðarhlíðarhreppi -1737-1738. Bóndi á Ásum á Bakásum 1738-1739 og í Auðólfsstaðakoti -1740-1741-. – Ókunnugt um kvonfang og börn.

Athugasemd: Helgi gæti vel verið samnefndur maður (föðurnafn ótilgreint) sem var búlaus í Bólstaðarhlíðarhreppi -1745-1746-.

Hinrik Hinriksson.

F. 1808 (sk. 8. sept. 1808) á Vatnsenda í Ólafsfirði, d. 1. apríl 1867 á Skorrastað í Norðfirði. For.: Hinrik Jónsson b. og hreppstj. í Réttarholti í Blönduhlíð og k.h. Sigríður Jónsdóttir. Nam undir skóla hjá feðgunum Pétri Péturssyni presti og Brynjólfi Péturssyni stúdent á Víðivöllum í Blönduhlíð. Lærði í Bessastaðaskóla og varð stúdent þaðan utanskóla 1833. Bóndi á Álfgeirsvöllum á Efribyggð 1833-1838, á Reykjavöllum á Neðribyggð 1838-1839, í Efra-Ási í Hjaltadal 1839-1840, á Starrastöðum á Fremribyggð 1840-1848 og á Bergsstöðum 1848-1858 og hafði jafnframt bú á Barkarstöðum 1849-1858. Bóndi á Skorrastað 1858 til æviloka. Vígðist 9. maí 1839 aðstoðarprestur séra Benedikts Vigfússonar á Hólum í Hjaltadal. Hann var aðstoðarprestur í Hólaprestakalli í Skagafjarðarprófastsdæmi 1839-1840 og í Mælifellsprestakalli í Skagafjarðarprófastsdæmi 1840-1847, en sóknarprestur í Bergsstaðaprestakalli 1847-1858 og í Skorrastaðarprestakalli í Múlaprófastsdæmi 1858 til æviloka. Séra Hinrik var greiðasamur og vinfastur, mikill gleðimaður, skáldmæltur og skemtinn, þjóðhagasmiður bæði á tré og járn, heppinn læknir og hinn mætasti maður fyrir margra hluta sakir. Hann var sagður kvenhollur í meira lagi og gerðist mjög drykkfelldur á síðustu árum sínum, einkum eftir að hann flutti úr Svartárdal. Hann lét byggja upp Skorrastaðarkirkju. – Kona, g. 2. ágúst 1833, Margrét Magnúsdóttir, f. 10. jan. 1809 á Álfgeirsvöllum, d. 26. sept. 1878 í Ormsstaðahjáleigu í Norðfirði. For.: Magnús Þorsteinsson b. á Álfgeirsvöllum og k.h. Rut Konráðsdóttir. Margrét var í fóstri hjá föðurforeldrum sínum í Gilhaga á Fremribyggð 1816, en fermdist í Mælifellsprestakalli 1822. Hún var þjónustustúlka á Mælifelli á Fremribyggð 1827-1830 og á Miklabæ í Blönduhlíð 1830-1833, en í skjóli systurdóttur sinnar Þorbjargar Pálsdóttur í Ormsstaðahjáleigu 1867 til æviloka. Margrét var vel að sér til sálar og líkama, mikil kjarkkona og einstök stillingarmanneskja, ræðin og skemmtin í viðmóti, góðsöm og gestrisin. Börn: Þorsteinn, f. 14. maí 1832 á Miklabæ, b. í Efri-Miðbæ í Norðfirði, kv. fyrr Þórunni Þorleifsdóttur, síðar Guðnýju Hermannsdóttur, átti einnig dætur með Önnu Ólafsdóttur og Guðbjörgu Árnadóttur, eina með hvorri, og son með Dagbjörtu Eyjólfsdóttur. Magnús, f. 4. júlí 1834 á Álfgeirsvöllum, d. 20. júlí 1834 á sama stað. Magnús, f. 15. júní 1836 á Álfgeirsvöllum, d. 3. mars 1837 á sama stað. Barnsmóðir: Elín Árnadóttir, f. 8. ágúst 1811 í Flensborg í Hafnarfirði, d. 26. nóv. 1887 í Holti undir Eyjafjöllum, vk. í Lambhúsum á Álftanesi. For.: Árni Helgason húsmaður í Flensborg og k.h. Ingibjörg Ólafsdóttir. Elín giftist síðar Sveinbirni Guðmundssyni pr. í Eystri-Kirkjubæ á Rangárvöllum. Barn: Björg, f. 11. sept. 1833 í Lambhúsum. – Barnsfaðir Margrétar: Jón Pálsson, f. um 1795, d. 9. nóv. 1837 í Holti á Álftanesi, vm. í Gilhaga. For.: Páll Jónsson b. á Hofstöðum í Hofstaðabyggð og s.k.h. Guðrún Jónsdóttir. Jón var hjá foreldrum sínum á Hofstöðum 1801. Hann var ráðsmaður í Héraðsdal í Tungusveit 1831-1832. Barn: Sveinn, f. 16. okt. 1825 á Mælifelli, b. á Bergsstöðum, kv. Þuríði Ásmundsdóttur, átti áður dóttur með Unu Hinriksdóttur. Barnsfaðir Margrétar: Hjálmur Eiríksson, f. 4. maí 1802 á Ábæ í Austurdal, d. 28. júlí 1872 á Kúskerpi í Blönduhlíð, b. á Kúskerpi. For.: Eiríkur Eiríksson b. á Keldulandi á Kjálka og k.h. Guðrún Jónsdóttir. Barn: Jón, f. 13. jan. 1830 á Mælifelli, b. á Fossum, kv. Kristínu Gísladóttur.

Athugasemd: Hinrik er sagður fæddur 8. sept. 1809 í Íslenzkum æviskrám og Prestaæfum Sighvats Grímssonar Borgfirðings. Ártalið er rangt, en dagsetningin kann að vera rétt.

(Íslenzkar æviskrár II, 348-349 og IV, 362-363; Borgfirzkar æviskrár V, 45-46 og XI, 180-181; Landeyingabók, 194-195; Rangvellingabók I, 81-82; Skagfirzkar æviskrár 1850-1890 V, 133-135; Skagfirzkar æviskrár 1890-1910 II, 139-140; Ættir Austfirðinga, 437 og 725; Saga frá Skagfirðingum II, 17, 64, 78, 115, 159 og 176, III, 37-38, 104, 119, 122-123, 151-152 og 167 og IV, 21-22; Hlynir og hreggviðir, 104-105; Langt inn í liðna tíð, 101-106; Ritsafn Stefáns Jónssonar á Höskuldsstöðum I, 100-101 og IV, 192-193; Húnavaka 1979, 109-110 og 112; Annáll nítjándu aldar III, 338-339 og IV, 287; Skuld 31. okt. 1878; Skiptab. Hún. 17. ágúst og 11. sept. 1856; Skiptab. Skag. 6. júlí 1827, 28. júlí 1828, 31. mars 1829 og 23. mars 1850; Prestaæfir Sighvats Grímssonar Borgfirðings (þáttur Hinriks Hinrikssonar á Skorrastað); Ættatölub. Jóns Espólíns, 401, 469-470, 1695, 2149-2151 og 5267-5268; Ættatölub. Ólafs Snóksdalíns, 229, 234, 563, 825 og 830; Ættatölub. Steingríms Jónssonar, 201, 356, 4782, 4932-4933 og 4942).

Hjálmar Loftsson.

F. 1816 á Ásum á Bakásum, d. 20. ágúst 1866 í Þverárdal. For.: Loftur Nikulásson b. á Ásum og s.k.h. Guðrún Illugadóttir. Var hjá foreldrum sínum á Ásum 1816 og fermdist í Svínavatnssókn 1830. Bóndi á Ásum 1838-1843, á Tindum á Ásum 1843-1848 og á Æsustöðum 1848-1861 og hafði jafnframt bú á Tindum 1848-1849 og í Syðri-Mjóadal 1852-1861. Bóndi í Þverárdal 1861 til æviloka. Hjálmar þótti manna föngulegastur á velli. Hann var merkisbóndi og einn af brautryðjendum Bólhlíðinga í búskaparframförum. Á Æsustöðum fékkst hann við vatnsveitingar og hlöðubyggingar. – Fyrri kona, g. 31. maí 1838, Björg Pálmadóttir, f. 26. okt. 1818 á Holtastöðum í Langadal, d. 2. des. 1846 á Tindum. For.: Pálmi Jónsson b. í Sólheimum í Svínavatnshreppi og k.h. Ósk Erlendsdóttir. Björg fermdist í Svínavatnssókn 1833. Börn: Pálmi, f. 17. mars 1839 á Ásum, b. í Þverárdal, kv. Helgu Jónsdóttur, þau stjúpsystkini. Loftur, f. 26. maí 1840 á Ásum, d. 6. júní 1840 á sama stað. Guðrún, f. 20. júlí 1841 á Ásum, d. 31. júlí 1841 á sama stað. Gísli Benedikt, f. 21. febr. 1844 á Tindum, b. í Þverárdal, kv. Guðrúnu Gísladóttur, þau systrabörn. Andrés, f. 15. apríl 1845 á Tindum, d. 15. júlí 1846 á sama stað. Pétur, f. 5. sept. 1846 á Tindum, d. 19. febr. 1864 á Geithömrum. Seinni kona, g. 14. okt. 1848, Helga Stefánsdóttir, f. 27. júlí 1798 í Flatatungu á Kjálka, d. 13. maí 1878 í Sauðanesi á Ásum, ekkja Þorsteins Ólafssonar b. á Æsustöðum. For.: Stefán Guðmundsson b. í Flatatungu og 3.k.h. Helga Sveinsdóttir. Helga bjó ekkja á Æsustöðum 1866-1867, en var húskona í Sauðanesi 1867-1870. Hún var í skjóli Jóns sonar síns í Sauðanesi 1870-1871, í skjóli Helgu dóttur sinnar í Þverárdal 1871-1875 og í skjóli Jóns sonar síns í Sauðanesi 1875 til æviloka. Helga var afbragðskona og mikill skörungur. Barnlaus. Barnsmóðir: María Jónsdóttir, f. 21. des. 1817 í Kúskerpi í Refasveit, d. 19. jan. 1847 í Vatnahverfi í Refasveit, húsk. á Tindum 1845. For.: Jón Guðmundsson b. í Skyttudal og barnsm.h. Ólöf Ólafsdóttir vk. í Kúskerpi. María var gift Semingi Semingssyni b. í Vatnahverfi. Barn: Benedikt, f. 2. jan. 1846 í Svínavatnssókn, d. 16. júlí 1846 á Tindum.

(Saga Íslendinga í Norður-Dakota, 255-256; Fortíð og fyrirburðir, 91-93; Troðningar og tóftarbrot, 228-229; Ritsafn Stefáns Jónssonar á Höskuldsstöðum II, 33-38; Húnavaka 1976, 48-49; Brandsstaðaannáll, 157 og 185; Skiptab. Hún. 20. nóv. 1821, 17. mars 1832 og 19., 20. og 23. apríl 1847; Skeggsstaðaætt – Handrit Björns Bjarnasonar á Brandsstöðum; Ættatölub. Jóns Espólíns, 3063, 3767 og 4760; Ættatölub. Ólafs Snóksdalíns, 537, 543, 819 og 831; Ættatölub. Steingríms Jónssonar, 5164).